Наманганда ўқитувчи топшириқни ўқий олмагани учун биринчи синф ўқувчисининг юзига бир неча бор урди. Видео
Наманганда педагог топшириқни ўқий олмагани учун биринчи синф ўқувчисининг юзига бир неча бор урди. Видео
Ижтимоий тармоқларда ўқитувчи дарс пайтида боланинг юзига бир неча бор ургани акс этган видео тарқалди. Маълум бўлишича, воқеа Наманган вилоятида содир бўлган, вилоят мактабгача ва мактаб таълими бошқармаси эса аллақачон хизмат текширувини бошлаган.
Ҳодиса 16 сентябрь куни тахминан соат 10:30 да, учинчи дарс пайтида, Косонсой туманидаги 39-сонли мактабнинг 1-«Б» синфида юз берган. Дастлабки маълумотларга кўра, ўқитувчи бола китобдаги топшириқни ўқий олмаганидан кейин унга нисбатан жисмоний куч ишлатган.
Юз берган воқеанинг барча тафсилотларини аниқлаш мақсадида бошқарма томонидан ишчи гуруҳ тузилган. Ҳозирда хизмат текшируви ўтказилмоқда, унинг якунлари бўйича содир бўлган воқеа ва масъул мансабдор шахсларнинг хатти-ҳаракатларига ҳуқуқий баҳо берилади.
Текширув натижаларига кўра, мактаб раҳбарияти ва ўқитувчига нисбатан қонунчиликда белгиланган тартибда тегишли чоралар кўрилиши мумкин.
Вилоят бошқармаси таълим муассасаларида ўқувчиларнинг ҳуқуқлари ва қонуний манфаатларини таъминлаш, уларнинг шаъни ва қадр-қимматини ҳурмат қилиш ҳамда зўравонликнинг ҳар қандай шаклига йўл қўймаслик зарурлигини таъкидлади.
Ушбу ҳолат педагогларнинг болаларга нисбатан зўравонлиги учун жавобгарлик кучайтирилган бир пайтда юз берди. Ўзбекистонда вояга етмаганларга нисбатан жисмоний ёки руҳий зўравонлик учун БҲМнинг 1 бараваридан 5 бараваригача жарима кўзда тутилган, маъмурий жавобгарликка тортилган педагоглар эса бир йилга болалар билан ишлашдан четлаштирилади.