Наманган вилоятида яшовчи фуқаро террорчиларни ёллаш ва молиялаштиришда айбланиб, 15 йилга озодликдан маҳрум этилди

2 соат олдин

Наманган вилояти Поп туманида яшовчи фуқаро халқаро террорчилик ташкилотида иштирок этиш, жангариларни молиялаштириш ва ватандошларни Сурияга юборишнинг ноқонуний каналини ташкил этишда айбланиб, 15 йил-у 2 ой муддатга озодликдан маҳрум этилди. Тергов жараёнида у томонидан жанговар ҳаракатлар ҳудудига олиб чиқиб кетилганлар орасида Ўзбекистон фуқаролари, жумладан, уч ёшга тўлмаган болалари бўлган аёллар ҳам борлиги аниқланди.

Иш материалларига кўра, эркак экстремистик ғояларга 2004 йилдаёқ пул топиш учун борган Россиядаги фаолияти давомида қизиқа бошлаган. 2009 йилда у шериги билан бирга Москвадаги «Выхино» метро бекати яқинида «Ҳалол» умумий овқатланиш шохобчасини очган. Ушбу муассасада яширин диний йиғилишлар ўтказилиб, унда эркак «Туркистон ислом ҳаракати» етакчиси Тоҳир Йўлдошевнинг маърузаларини ва «жиҳод»га чорловчи ёллаш видеоматериалларини томоша қилган.

2010 йил сентябрь ойида эркак Эронга йўл олган, кейин эса Покистонга ўтган. Шимолий Вазиристон ҳудудида у «Жамоат Ансоруллоҳ» халқаро террорчилик ташкилотига аъзо бўлиб, «Содиқ» тахаллуси остида қасамёд («байъат») қилган ва жанговар лагерда ҳарбий ҳамда мина-портловчи тайёргарлик курсини ўтаган.

2012 йил сентябрь ойида у Туркия орқали транзит билан Суриянинг Идлиб вилоятига ўтиб, у ерда «Жабҳат ан-Нусра» гуруҳига қўшилган, 2013 йилдан бошлаб эса таъминотчи сифатида «Катиба Тавҳид ва Жиҳод» гуруҳига аъзо бўлган. Тергов аниқлашича, 2020 йил охирида у Идлибда новвойхона очиб, унинг даромадининг 60 фоизини — ҳафтасига 250 доллардан 350 долларгача — жангарилар фаолиятини молиялаштириш учун мунтазам равишда ўтказиб турган.

Кейинчалик унинг фаолияти 2021 йил сентябрь ойида оиласи билан кўчиб ўтган Туркияда давом этган. Истанбулда бўлган вақтида эркак «Катиба Тавҳид ва Жиҳод» ва «Катиба Гуроба» террорчилик ташкилотлари билан алоқаларини сақлаб қолган. 2025 йилнинг май ойидан октябрь ойигача у шериклари билан биргаликда Туркиядан Сурияга янги ёлланганларни ноқонуний ўтказишнинг доимий каналини ташкил қилган ва ҳар бир ўтказилган шахс учун 500 доллардан 1 000 долларгача пул олган. У томонидан ўтказилган шахслар орасида ўнлаб Ўзбекистон фуқаролари, жумладан, вояга етмаган болалари бўлган аёллар ҳам бор бўлиб, уларнинг айримлари ҳали уч ёшга ҳам тўлмаган эди. Навбатдаги ёлланганлар гуруҳини ўтказишга уриниш пайтида, 2025 йил 11 октябрда у Туркия ҳуқуқ-тартибот идоралари томонидан қўлга олинган.

Бундан ташқари, эркак юк ташиш бизнеси ниқоби остида Суриядаги жангариларга турли товарлар, ускуналар ва эҳтиёт қисмлар етказиб берган. Шунингдек, тергов аниқлашича, у Telegram ва WhatsApp мессенжерлари орқали «Абу Асия» тахаллуси остида Ўзбекистон, Тожикистон ва Қирғизистон фуқароларининг паспортлари, биометрик ҳужжатлари ва ID-карталари нусхаларини ноқонуний равишда йиққан, сақлаган ва учинчи шахсларга топширган.

Тергов давомида унга нисбатан Жиноят кодексининг бир нечта моддалари, жумладан, шахсга доир маълумотлар тўғрисидаги қонунчиликни бузиш, ёлланиш, терроризм, террорчилик фаолиятини амалга ошириш мақсадида таълим олиш, терроризмни молиялаштириш, конституциявий тузумни зўрлик билан ўзгартиришга оммавий даъват қилиш, жиноий уюшма ташкил этиш ва тақиқланган ташкилотлар фаолиятида иштирок этиш бўйича айбловлар қўйилди.

Суд эркакни айбдор деб топди ва жиноятлар мажмуини ҳисобга олиб, жазоларни қисман қўшиш йўли билан узил-кесил — 15 йил-у 2 ой муддатга озодликдан маҳрум қилиш жазосини тайинлади. Маҳкум жазони умумий тартибли колонияда ўтайди.