Муратов: Уиткофф Москвадан бўш самолётда қайтмаслиги керак
Тинчлик бўйича Нобел мукофоти совриндори Дмитрий Муратов Доналд Трампнинг музокарачилари Стивен Уиткофф ва Жаред Кушнерни Владимир Путин билан учрашувларда Россиядаги сиёсий маҳбусларни озод қилиш масаласини кўтаришга чақирди. У АҚШ вакиллари Кремлдан қайтишда озод этилган маҳбусларни ўз самолётида олиб кетиши мумкинлигини айтди.
Муратов: Уиткофф Москвадан бўш самолётда қайтмаслиги керак
«Новая газета»нинг ҳаммуассиси ва собиқ бош муҳаррири Дмитрий Муратов АҚШ президенти Доналд Трампнинг махсус вакили Стивен Уиткофф ҳамда президент куёви Жаред Кушнерга мурожаат қилди.
Муратов уларни Россия президенти Владимир Путин билан бўладиган музокараларда россиялик сиёсий маҳбусларни озод қилиш масаласини кўтаришга чақирди.
Нобел мукофоти совриндори бу фикрни 19-сентабр куни СНН эфирида айтди. Унингча, инсон ҳуқуқларига риоя этилиши ва кенг кўламли халқаро тўқнашув хавфи бир-бири билан бевосита боғлиқ.
Муратовнинг айтишича, Уиткофф Кремлдаги навбатдаги учрашувдан сўнг АҚШга қайтаётганда озод қилинган бир неча маҳбусни ўз самолётида олиб кетиши мумкин.
«Нега у яхши муносабатларга эга бўлган жаноб Путиндан бир нечта сиёсий маҳбусни озод қилишни сўрай олмайди?» - деди у.
Муратовнинг таъкидлашича, Уиткоффнинг самолёти Москвадаги музокаралардан кейин одатда йўловчиларсиз АҚШга қайтади. Журналист Америка вакиллари дипломатик алоқаларидан одамларни озод қилиш учун ҳам фойдаланиши керак, деб ҳисоблайди.
Муратов бунга мисол сифатида АҚШнинг махсус вакили Жон Коулнинг Беларус раҳбари Александр Лукашенко билан олиб бораётган музокараларини келтирди.
Коул билан 16-сентабр куни бўлиб ўтган навбатдаги учрашувдан кейин Беларус колонияларидан яна 25 нафар сиёсий маҳбус озод қилинган. Бунинг эвазига АҚШ Беларуснинг икки корхонасига нисбатан жорий этилган санксияларни бекор қилган.
Муратовнинг фикрича, маҳбусларни озод қилиш бўйича шунга ўхшаш музокараларни Россия билан ҳам олиб бориш мумкин.
Стивен Уиткофф ва Жаред Кушнер охирги марта 5-сентабр куни Кремлда Владимир Путин билан учрашган эди. Бу Уиткоффнинг Украинадаги урушни тугатиш имкониятларини муҳокама қилиш учун Москвага саккизинчи ташрифи бўлди.
Эртаси куни Америка вакиллари Полша орқали поездда Киевга бориб, Украина президенти Володимир Зеленский билан музокара ўтказди. Кейин улар Полша орқали АҚШга қайтди.