Мудофаа стартапларига 115 млн евро: Европарламент янги дастурни маъқуллади
Европарламент янги мудофаа технологияларини ишлаб чиқувчи кичик ва ўрта корхоналарни қўллаб-қувватлаш учун 115 млн евролик АГИЛЕ дастурини маъқуллади. Уни 2027-йил бошида ишга тушириш режалаштирилган, аммо бунинг учун ҳали Европа Иттифоқи кенгашининг тасдиғи керак.
Мудофаа стартаплари учун 115 млн евро: Европарламент янги дастурни тасдиқлади
Европарламентнинг 6-октабрдаги хабарига кўра, ташаббусни 536 депутат қўллаб-қувватлаган. 101 депутат қарши овоз берган, 16 нафари эса бетараф қолган.
АГИЛЕ — тезкор мудофаа инновацияларини қўллаб-қувватлаш дастури — янги технологиялар устида ишлаётган корхоналарга тез ва аниқ молиявий ёрдам беришга йўналтирилган. Ундан стартаплар ҳам, фаолиятини кенгайтираётган компаниялар ҳам фойдаланиши кўзда тутилган.
Дастур мудофаа соҳасидаги ишланмаларни яратиш, синовдан ўтказиш ва бозорга чиқариш жараёнини тезлаштириши керак. Шу мақсадда грантлар ажратиш тартибини тезлаштириш, шунингдек, синов ва сертификатлаш имкониятларидан фойдаланишни енгиллаштириш режалаштирилган.
ЕИга аъзо давлатлар дастур доирасида ҳал этилиши керак бўлган вазифаларни белгилаш жараёнида иштирок этиши мумкин. Бу орқали ишлаб чиқилаётган маҳсулотларни қуролли кучларнинг амалий эҳтиёжларига мослаштириш кўзланган.
ЕИнинг технологиялар бўйича комиссари Ҳенна Вирккунен аввалроқ АГИЛЕ Европанинг энг ижодкор технологик компанияларини мудофаа саноатига яқинлаштириши кераклигини айтган эди.
Мудофаа бўйича комиссар Андрюс Кубилюс эса уруш олиб бориш усуллари кескин ўзгараётганини таъкидлаб, қуролли кучларга янги технологиялар, тезкор етказиб бериш ва рақобатбардош нархлар зарурлигини билдирган.
Европарламент ва ЕИ кенгаши музокарачилари дастур бўйича дастлабки келишувга 2026-йил июлда эришган. Энди ҳужжат ЕИ кенгаши томонидан маъқулланиб, расмий журналда эълон қилиниши керак.