Моуринё Винисиусга бўлаётган ножўя ҳаракатлар юзасидан кескин фикр билдирди

Моуринё Винисиусга нисбатан қилинаётган ножўя хатти-ҳаракатларни қоралади

"Реал" бош мураббийи Жозе Моуринё Ла Лиганинг 2-турида "Эспанёл" устидан 2:1 ҳисобида қозонилган ғалабадан сўнг ўтказилган матбуот анжуманида бразилиялик ҳужумчи Винисиус Жуниорнинг рақиблар ва мухлислар томонидан доимий камситишларга дуч келаётганини таъкидлади.

Моуринё шундай деди: "Винисиус ўз ҳис-туйғуларини кучли назорат қила олиши керак. Мен унга гол урса, уни қандай нишонлаш борасида эҳтиёткор бўлишини тайинладим. Биз бутун жамият таҳқирлаш ва камситишларга қарши курашаётган бир даврда яшаяпмиз, бироқ Винига келганда рақиблар ва ишқибозлар томонидан ҳамон шундай ножўя муносабат бўлаётганини кўриб турибмиз. Биз уни имкон қадар бундай ҳолатларга тайёрлашимиз керак, бор гап шу."

Эслатиб ўтамиз, ўтган мавсумда Чемпионлар Лигаси доирасида ўтган "Бенфика" — "Реал" учрашувида ҳам шунга ўхшаш ҳолат кузатилган эди. Ўшанда Лиссабон клубига устозлик қилган Моуринёнинг шогирди Жанлука Престианни Винисиусга нисбатан ирқчилик қилиб, камситувчи сўзларни ишлатганди. Якунда ушбу хатти-ҳаракати учун УЕФА Престианнини 6 та ўйинга дисквалификация қилган.

Маълумот учун, Ла Лиганинг 2-турида "Реал" сафарда "Эспанёл"ни 2:1 ҳисобида мағлуб этди. Мадридликлар сафида Жуд Беллингем ҳамда Карлос Эспи гол киритган бўлса, мезбонларнинг ягона жавоб тўпига Алекс Калатрава муаллифлик қилди.