Моуринё 125 млн евролик футболчини ҳимоя қилди
**Моуринё 125 миллион евролик футболчини ҳимоя қилди**
Мадриднинг “Реал” клуби бош мураббийи Жозе Моуринё Ян Диомандени фақат унинг трансфери учун тўланган улкан маблағга қараб баҳоламасликка чақирди.
Ёш футболчи “Лейпсиг”дан Мадридга 125 миллион евро эвазига ўтди, шунингдек, яна 5 миллион евро бонуслар кўринишида тўланиши режалаштирилган. Бироқ, Диоманде трансфердан сўнг янги жамоаси сафида ҳали гол ура олмади.
Голларнинг йўқлигига қарамай, Моуринё хавотирга сабаб кўрмаётганини ва янги футболчига мослашиш ҳамда ўз салоҳиятини босқичма-босқич намойиш этиш учун вақт кераклигини таъкидлади.
“У босқичма-босқич ҳаракат қилиши керак. Ян кўп меҳнат қилмоқда ва буни яхши бажаряпти. У очиқкўнгил ва камтар йигит, ўрганишни хоҳлайди, жамоадошларининг фикрларига қулоқ тутади ва келажакда, албатта, ривожланади”, деди мураббий.
“Реал” устози трансфер нархининг юқорилиги ёш футболчидан нотўғри кутилмалар пайдо бўлишига сабаб бўлмаслиги кераклигини урғулади:
“Катта маблағга амалга ошган трансферга қараб футболчидан кўп нарса кутиш менинг ишим эмас. Мен учун муҳими — “Лейпсиг” сафида жуда кучли мавсум ўтказган футболчини кўриш”.
Моуринёнинг фикрича, футболчи учун шундай катта маблағ тўланганда, мухлислар ундан автоматик равишда дарҳол натижа кутишни бошлайди. Бироқ, Диоманде ҳолатида бундай ёндашув адолациз.
“Шундай катта сумма ҳақида эшитганингизда, жамоага келиши биланоқ барчани ҳайратда қолдирадиган футболчини тасаввур қиласиз. Аммо бу ерда вазият бошқача. Олдимизда ёш футболчи турибди. Хотиржамликни сақлаш ва хавотирга берилмаслик керак”, деди Моуринё.
Ян Диоманденинг бугунги кунгача эришган асосий шахсий ютуғи 2025/26-йилги мавсум якунларига кўра Бундеслиганинг энг яхши ёш футболчиси деб топилганидир.
Ўтган мавсумда вингер Германия клуби сафида 36 та учрашувда майдонга тушиб, 13 та гол урди ва 9 та голли узатмани амалга оширди.
Муваффақиятли мавсум Диомандега фаолиятида навбатдаги қадамни ташлаш имконини берди: 2026-йилнинг ёзида 19 ёшли футболчи Испанияга кўчиб ўтиб, Мадриднинг “Реал” клуби футболчисига айланди.