Москвада қарсак, Германияда танқид: собиқ канслер Шрёдер «Глобус»га борди
Германиянинг собиқ канслери Герҳард Шрёдер Россиядаги «Гиперглобус» компанияси кузатув кенгашига тайинланганидан сўнг Москвадаги гипермаркетлардан бирига ташриф буюрди. Уни ходимлар қарсаклар билан кутиб олган, Германияда эса унинг янги лавозими кескин танқидга учрамоқда.
Москвада олқиш, Германияда танқид: собиқ канслер Шрёдер «Глобус»га келди
РБК хабарига кўра, 82 ёшли Шрёдер 7-октабр куни «Глобус» гипермаркети ходимлари билан саломлашиб, компания раҳбарияти ҳамда жамоаси билан учрашган.
«Гиперглобус» матбуот хизмати ДВъга собиқ канслер компаниянинг стратегик ривожланишига раҳбарлик қилишини тасдиқлаган. Олдинги баёнотда эса унинг умумий бошқарувда иштирок этиши ва Россия бозоридаги фаолиятни узоқ муддатли режалаштиришга кўмаклашиши айтилган.
Компания вакиллари Шрёдер тайинловини экспертлик ёрдамини кучайтириш зарурати билан изоҳлаган. Таъкидланишича, унинг тажрибаси мулоқотга таянган ёндашув ва конструктив ечимлар топишга ёрдам беради.
Германиядаги Глобус Ҳолдинг эса Россиядаги гипермаркетлар 2025-йил 1-январдан бошлаб унинг таркибидан тўлиқ ажратилганини билдирган. Холдинг баёнотига кўра, «Гиперглобус» ҳуқуқий ва ташкилий жиҳатдан мустақил фаолият юритади.
Россиядаги бизнес Германиянинг Санкт-Вендел шаҳрида жойлашган ТМБ Ҳолдинг компаниясига ўтказилган. Бироқ Германия нашрлари бу компания ҳам Глобус бизнесини ривожлантириб келаётган Брух оиласига тегишли эканини ёзган.
Шрёдернинг янги лавозими Германиядаги айрим сиёсатчиларнинг норозилигига сабаб бўлди. Бундестаг депутати, Христиан-демократик иттифоқ вакили Родерих Кизеветтер буни «Европа ва ўз мамлакатига хиёнат» деб атаган.
Берлиндаги Фан ва сиёсат жамғармаси иқтисодчиси Янис Клуге эса компания бу тайинлов орқали Россиядаги активларининг вақтинча бошқарувга ўтказилишидан ўзини ҳимоя қилишга уринаётган бўлиши мумкин, деган фикрни билдирган.
Шу билан бирга, «Гиперглобус» Россияда кенгайишни режалаштирмоқда. Компания Зеленоградда 24 минг квадрат метрлик янги гипермаркет қурилишини эълон қилган. Лойиҳага 4 млрд рубл сармоя киритилиши кўзда тутилган; у очилгач, тармоқнинг Россиядаги гипермаркетлари сони 22 тага етиши кутилмоқда.
Шрёдер илгари ҳам Россия бизнеси билан алоқалари сабаб танқид қилинган. У аввал «Роснефт» ва «Шимолий оқим» газ қувури оператори раҳбариятида ишлаган.