Москвада бир кунда икки мухолифатчи номзод ушланди
Москвада Россия Давлат думаси сайловларида бир мандатли округлардан иштирок этаётган мухолифатдаги «Яблоко» партиясининг икки номзоди - Анна Шатуновская-Бюрно ва Григорий Гришин ушланди. Уларга «экстремистик рамзларни намойиш этиш» билан боғлиқ маъмурий айблов қўйилган. Суд уларни айбдор деб топса, номзодлар сайлов кампаниясидан четлатилиши мумкин.
Москвада бир кунда икки мухолифатчи номзод ушлангани маълум қилинди
«Яблоко» партияси матбуот хизмати хабарига кўра, 4-сентабр куни Москвада Давлат думасига сайловда қатнашаётган икки номзод ҳуқуқни муҳофаза қилувчи органлар томонидан ушланган.
Анна Шатуновская-Бюрно ўз уйи яқинида ушланиб, «Якиманка» полиция бўлимига олиб кетилган. У Москвадаги 204-сонли Преображенский бир мандатли сайлов округидан Давлат думаси депутатлигига номзод сифатида кўрсатилган.
Полиция Шатуновская-Бюрнога нисбатан Россия Маъмурий ҳуқуқбузарликлар тўғрисидаги кодексининг 20.3-моддаси бўйича баённома тузган. Мазкур модда «экстремистик ташкилотлар рамзларини тарғиб қилиш ёки оммавий намойиш этиш» учун жавобгарликни назарда тутади.
Ўша куни фуқаролик кийимидаги ходимлар «Яблоко»нинг яна бир номзоди Григорий Гришиннинг уйига ҳам борган. У 197-сонли Ленинград бир мандатли округидан сайловда иштирок этмоқда.
Партия вакилларининг айтишича, Гришиндан маъмурий материалларни расмийлаштириш учун «Академический» полиция бўлимига бориш сўралган.
Григорий Гришин филология фанлари номзоди бўлиб, рус тили ва адабиётидан дарс беради, шунингдек, ҳужжатли кино билан шуғулланади.
Унга нисбатан ҳам Маъмурий кодекснинг 20.3-моддаси бўйича иш расмийлаштирилгач, полициядан қўйиб юборилган.
Ҳуқуқни муҳофаза қилувчи органларнинг Гришинга оид эътирози унинг 2024-йилда Телеграмъда эълон қилган пости билан боғлиқ экани айтилмоқда.
Агар суд Гришин ва Шатуновская-Бюрнони ушбу ҳуқуқбузарликда айбдор деб топса, улар сайлов кампаниясидан четлатилиши мумкин.
Партиянинг яна бир номзоди Артём Снеговский 1-сентабр куни Москвада ушланган эди. У 198-сонли Люблино бир мандатли округидан Давлат думасига сайловда қатнашмоқда.
Снеговскийга нисбатан 2022-йилдаги публикацияси сабаб Маъмурий кодекснинг 20.3.3-моддаси — Россия Қуролли кучларини «обрўсизлантириш» бўйича маъмурий иш қўзғатилган.
Бироқ бу модда бўйича маъмурий жавобгарликка тортилиш, 20.3-моддадан фарқли равишда, ўз-ўзидан номзоднинг сайлов кампаниясида иштирок этиш ҳуқуқидан маҳрум бўлишига олиб келмайди.