Мўғулистон пойтахти яқинида айиқ уйга ҳужум қилиб, бир кишини ўлдирди
Полициянинг маълум қилишича, айиқ Улан-Батор яқинидаги анъанавий кўчманчилар уйига кириб, бир эркакни ўлдирган ва бир аёлни оғир яралаган.
Мўғулистон пойтахти яқинида айиқ уйга ҳужум қилиб, бир кишини ўлдирди
Мўғулистон пойтахти Улан-Батор яқинида айиқ ўз уйида бўлган эр-хотинга ҳужум қилиши оқибатида бир эркак ҳалок бўлди, бир аёл эса оғир жароҳат олди.
Полициянинг маълум қилишича, воқеа чоршанбага ўтар кечаси Баянзурх туманида, уларнинг ўтов (гэр) деб аталадиган анъанавий мўғул кўчманчи уйи ичида содир бўлган.
40 ёшлардаги эркак ҳалок бўлган, 50 ёшлардаги аёл эса қочишга муваффақ бўлиб, қўшниларни огоҳлантирган. Шаҳар расмийси Мунхбаяр М. журналистларга аёлнинг шифохонада оғир аҳволда ётганини маълум қилди.
Иқлим ўзгариши ва озиқ-овқат танқислиги каби омиллар туфайли Мўғулистонда одамлар яшайдиган жойлар яқинида айиқлар пайдо бўлиши тез-тез кузатилмоқда.
Ўрмончилар гуруҳи айиқни қидирмоқда, расмийлар эса маҳаллий аҳолини ҳушёр бўлишга ва ҳар қандай шубҳали ҳолат ҳақида хабар беришга чақирди.
AFP ахборот агентлиги хабарига кўра, Мунхбаяр жорий йилнинг ўзида пойтахт яқинида 24 марта айиқ кўрилганини, 2018 йилда эса бундай ҳолат бор-йўғи икки марта қайд этилганини айтган.
Сўнгги ҳафталарда Мўғулистон ижтимоий тармоқларида айиқларнинг ўтовларга кириб бораётгани ёки уларга шикаст етказаётгани, шунингдек, чорва молларига ҳужум қилаётгани акс этган видеолар кенг тарқалди, бу эса бутун мамлакат бўйлаб айиқлар ва одамлар ўртасидаги тўқнашувлар кўпайганини кўрсатмоқда.
AFP хабарига кўра, саккизта вилоятда айиқ овлаш учун рухсатномалар берилган ва расмийлар қишлоқ жойлардаги ўрмончиларга ёрдам бериш учун транквилизаторли (тинчлантирувчи) ўқ отадиган қуролларни етказиб беришга ҳаракат қилмоқда.
Кўпгина мўғуллар кўчманчи ҳаёт тарзини олиб боради, бироқ ўтроқ деҳқончилик жамоалари ҳам тобора кенг тарқалмоқда. Ҳозирда аҳолининг тобора кўпроқ қисми пойтахт ёки бошқа йирик шаҳар марказларида истиқомат қилмоқда.