Митч Макконнелл уч ойлик танаффусдан кейин Сенатга қайтди
Июнь ойидан бери қатнашмаётган республикачи сенатор ўз соғлиғи билан боғлиқ шаффофлик масаласида саволларга дуч келди.
Митч Макконнелл уч ойлик танаффусдан кейин Сенатга қайтди
АҚШ сенатори Митч Макконнелл уч ой аввал йиқилиб тушиб, шифохонага ётқизилганидан бери илк бор Конгрессга қайтди.
«Мен Сенат залига қайтишни ва ҳамкасбларимни кўришни жуда интизорлик билан кутгандим», деди Кентукки штатидан бўлган 84 ёшли республикачи суд тизимига номзод бўйича овоз беришдан олдин.
Макконнеллнинг узоқ вақт давомида йўқлиги унинг соғлиғи ҳақида кенг тарқалган миш-мишларга, шунингдек, демократлар томонидан кўпроқ шаффофлик таъминланиши ҳақидаги талабларга сабаб бўлди.
Сенат тарихидаги энг узоқ муддат хизмат қилган партия етакчиси Сенатда 41 йил фаолият юритган.
«Соғайиш жараёним узоқ ва кўпинча асабийлаштирадиган кечди, болаликдаги полиомиелитнинг асоратлари эса буни янада қийинлаштирди», деди Макконнелл душанба куни.
«Мен ҳали ҳам 100 фоиз ўзимга келганим йўқ», дея қўшимча қилди у ва «қийин овоз бериш жараёнларида иштирок этиш учун қўлимдан келганини қиламан» деди.
«Шу ойда уларнинг [Кентуккилик ҳамюртларим] номидан одатий иш фаолиятимга қайтишдан хурсандман», дея якунланади унинг баёноти.
Сенаторнинг АҚШ пойтахтидаги уйини тарк этаётгани тасвирланган видеода унинг ногиронлар аравачасига ўтқизилиб, машинага олиб борилгани акс этган.
Орадан кўп ўтмай у Сенат залида кўриниш берди ва у ерда бир нечта сенаторлар уни кутиб олишди.
Макконнелл охирги марта 11 июнь куни овоз берган эди. Унинг қаерда эканлиги ҳақидаги саволлар кўпайгач, унинг идораси бир ойдан кейин баёнот бериб, у 14 июнь куни уйида йиқилиб тушгани ва шифохонада енгил зотнилжам (пневмония) касаллигидан даволанганини маълум қилди.
Сенат фахрийсининг соғлиғи билан боғлиқ хавотирлар сўнгги йилларда тез-тез пайдо бўлмоқда.
У 2024 йилда йиқилиб тушиб, енгил жароҳат олган эди. Бир йил олдин эса у яна бир бор йиқилиб, мия чайқалиши билан шифохонага ётқизилганди.
Шунингдек, 2023 йилда Макконнелл журналистлар билан гаплашаётиб, бир нуқтага тикилиб қолган ва бу унинг ақлий қобилияти ҳақида саволлар туғдирган эди.
Унинг душанба кунги қайтиши Сенат беш ҳафталик танаффусдан кейин қайта иш бошлаган биринчи кунга тўғри келди.
Сенаторлар энди ноябрь ойида бўлиб ўтадиган ва Конгрессдаги кучлар мувозанатини ўзгартириши мумкин бўлган оралиқ сайловлар олдидан қонунчилик ишларининг якуний босқичига киришмоқда.
Ваколат муддати январь ойида тугайдиган Макконнелл қайта сайланиш учун ўз номзодини қўймаяпти.