Миссисипида бир ёшли боланинг полиция томонидан отиб ўлдирилиши акс этган видеорегистратор тасвири эълон қилинди
Оила адвокатининг таъкидлашича, дўкондан буюм ўғирлаш айблови боланинг «ўлимига сабаб бўла олмайди».
Миссисипида бир ёшли боланинг полиция томонидан отиб ўлдирилгани акс этган видеоёзув эълон қилинди
Миссисипи расмийлари Walmart автотураргоҳида дўкондан ўғирлик қилингани ҳақидаги хабарга жавобан келган полиция офицери томонидан гўдакнинг отиб ўлдирилгани акс этган видеокузатув камераси видеосини жамоатчиликка эълон қилди.
14 июнь куни Сенатобия шаҳрида офицерлар ҳаракатланаётган автомобилни ўраб олган вақтда, бир ёшли Коэн Уайли онасининг тизида ўтирган бўлган.
Штат бош прокурори офицернинг куч ишлатиши асосли бўлган деган хулосага келди, офицернинг адвокати эса Би-би-сига берган баёнотида ҳайдовчи ҳуқуқ-тартибот идоралари ходимларини ўлдиришга уринганини айтди.
Боланинг оиласи отишма асоссиз бўлганини айтмоқда. Уларнинг адвокати Бен Крамп полициянинг ҳаракатларини "энг бошиданоқ ҳаддан ташқари мутаносиб бўлмаган" деб таърифлади.
Крампнинг таъкидлашича, дўкондан ўғирлик қилишда айблаш боланинг "ўлимига сабаб бўла олмайди".
Воқеа содир бўлганида Коэн Уайли автомобилда онаси Веллесия Уайли ва бошқа бир аёл билан бирга бўлган.
Сенатобия мэри Грег Грейвс Би-би-сининг АҚШдаги ҳамкори CBS телеканалига ўқ узган офицер Хантер Фостер истеъфога чиққанини тасдиқлади.
Сенатобия полиция департаменти Би-би-сининг тасдиқлаш ҳақидаги сўровларига дарҳол жавоб бермади.
Миссисипи расмийлари томонидан пайшанба куни эълон қилинган тасвирларда офицернинг биринчи шахс томонидан кўриниши акс этган.
Ходимлардан бири ўғирликда гумон қилинганлар қочиб кетаётганини айтганидан сўнг, беш нафар ҳуқуқ-тартибот органи ходими қурол ушлаган ҳолда машина томон югуради.
Автомобиль орқага ҳаракатланиб, тўхтаб турган машинага урилади ва кейин яна олдинга ҳаракатланади.
Видеокузатув камераси тақилган офицер яқинроқ югуриб, "Тўхта!" деб бақиради ва қуролини кўтариб, ҳаракатланаётган машинага қаратади.
Машина офицернинг жуда яқинидан ўтиб кетаётганда, у қуролидан ўқ узади ва йўловчи томондаги ойнани синдиради.
Полиция ҳайдовчига тўхташни буюраётганда тўртта ўқ овози эшитилади. Шунга қарамай, автомобиль автотураргоҳдан секин чиқиб кетишда давом этади.
Дўкон пештоқидаги кузатув камераси тасвирларидан кўринишича, офицер ўт очган пайтда, бошқа бир офицер ҳаракатланаётган автомобиль олдида турган бўлган.
"Автомобиль ҳайдовчиси ўша 5 нафар офицерни ўлдиришга уринган", деди офицер манфаатларини ҳимоя қилувчи адвокат Мартин Зуммах Би-би-сига берган баёнотида ва ўз мижозининг "қурол ишлатишдан бошқа чораси қолмаганини" қўшимча қилди.
"Одам ўлими содир бўлганидан жуда қайғудамиз", деди Зуммах. "Аммо тергов натижаси нафақат кутилган эди, балки у аллақачон чиқарилиши керак эди."
Боланинг онаси Уайли дугонаси билан дўкондан тагликлар ўғирлаганини рад этди. уларга нисбатан ҳеч қандай айблов қўйилмаган.
Боланинг ўлими Миссисипида эътирозлар ва мотам тадбирларига сабаб бўлди.
Матбуот анжуманида қариндошлар жавобгарликка тортишни талаб қилишди.
"Бугун кўрганларимдан сўнг, 'асосли' деган сўзни тушуниш мен учун қийин бўлмоқда", деди Коэн Уайлининг бувиси Ласандра Уильямс.