Миссисипи бош прокурорига кўра, бир ёшли боланинг ўлимига сабаб бўлган отишмада полиция куч ишлатиши «оқланган»
Бола полиция ходимлари томон ҳайдалганлиги айтилаётган автомобилнинг йўловчи ўриндиғида онасининг тизида ўтирган эди.
Миссисипи бош прокурори бир ёшли боланинг ўлими билан якунланган отишмада полиция куч ишлатишини «асосли» деб топди
Миссисипи полицияси дўкондаги ўғрилик бўйича суриштирув пайтида автомобилга қарата ўт очгани ва ичидаги бир ёшли боланинг ўлимига сабаб бўлганида «асосли» куч ишлатган, деб қарор қилди штат бош прокурори.
Коҳен Уайли июнь ойида Сенатобия шаҳрида полиция ходимлари томон ҳайдалгани айтилаётган автомобиль йўловчи ўриндиғида, онасининг тизида ўтирган вақтида ҳалок бўлган эди.
Расмийлар тагликлар ва болалар кийимлари ўғирлангани ҳақидаги хабарга жавобан воқеа жойига етиб келишганини билдирди.
Боланинг онаси бу айбловларни рад этди. На унга, на автомобиль ҳайдовчисига ҳеч қандай жиноий айблов қўйилмаган. Дўшанба куни Уайли оиласининг адвокати бош прокурорнинг хулосаларини қоралади ва воқеа видеосини эълон қилишга чақирди.
14 июнь куни болалар буюмлари ўғирлангани ҳақидаги хабардан сўнг полиция Walmart дўконига юборилган. Миссисипи Тергов бюроси маълумотларига кўра, ходимлар етиб келиб, икки аёл ва бир бола машина томон содир бўлаётган ҳаракатни кўришган.
Ходимлар транспорт воситасини тўхтатишга уринган, аммо автомобиль улардан бирининг устига ҳайдалиб, ходимни уриб юборишига сал қолган. Шундоқ қилиб, бир ходим ўт очган, бунинг оқибатида бола ҳалок бўлган, ҳайдовчи Латойя Феррелл эса оғир яраланган.
Коҳеннинг онаси Веллесия Уайли ўзи ёки Феррелл ўғрилик қилганини рад этди ва ўқ тегишидан олдин ўғлини полициячиларга кўрсатиш учун тизидан кўтарганини айтди.
«Ушбу ҳодисада Бош прокуратура куч ишлатилишини асосли деб топди», деди Миссисипи бош прокурори Линн Фитч дўшанба куни берилган қисқа баёнотда.
Полиция отишма акс этган ҳеч қандай видеони, жумладан бодикамера ёзувлари ёки автотураргоҳдаги кузатув камералари видеоларини эълон қилгани йўқ.
«Агар видеоёзув штат қарорини тасдиқласа, уни эълон қилинг», дея давом этди у. «Бу оила ҳақиқатга эришмагунча биз курашни тўхтатмаймиз».
Ўт очган полициячининг адвокати Мартин Зуммах Associated Press агентлигига ҳайдовчи унинг мижозини «ўлдиришга уринганини» айтди.
«Унинг қурол ишлатишдан бошқа чораси йўқ эди», деди Зуммах.
АҚШда қуллик тугатилганини англатувчи Июнь-ўн тўққизинчи (Juneteenth) байрами куни содир бўлган бу ўлим Сенатобияда норозилик намойишларига сабаб бўлди.
Намойишчилар терговда ирқий омил роль ўйнаганини даъво қилишмоқда. Коҳен ва ҳар иккала аёл қора танли, ўт очган полициячи эса, хабарларга кўра, оқ танлидир.
Ўтган ойда шаҳар ҳокимияти оқ танли полиция бошлиғини газеталар унинг қайта-қайта ирқий ҳақоратларни ишлатгани акс этган смс-хабарларни ошкор қилганидан кейин ишдан бўшатди.