Мисрда дунёдаги энг чуқур сунъий порт ҳавзаси барпо этилди
Мисрдаги Айн-Сохна портини ривожлантириш лойиҳаси Гиннеснинг рекордлар китобига киритилди. Порт ҳудудида қуруқликда барпо этилган дунёдаги энг чуқур сунъий порт ҳавзаси қурилган бўлиб, унинг чуқурлиги 19 метрга етади.
Мисрда дунёдаги энг чуқур сунъий порт ҳавзаси қурилди
Айн-Сохна Қизил денгиз бўйидаги энг йирик портлардан бири бўлиб, Сувайш канали иқтисодий зонаси маъмурияти бошқарувида
Миср Транспорт вазирлиги портни кенг кўламли реконструксия қилиш ва кенгайтиришга қаратилган йирик миллий лойиҳани амалга оширмоқда. Лойиҳанинг асосий вазифаси Айн-Сохнани Жанубий ва Шарқий Осиё, Европа ҳамда Шимолий Африка ўртасидаги савдо оқимларига хизмат қиладиган муҳим денгиз-логистика марказига айлантиришдир.
Лойиҳа доирасида жами тўртта порт ҳавзаси барпо этилди. Янги причалларнинг умумий узунлиги 18 километрдан ошади. Улар орасида 19 метр чуқурликка эга бўлган ва Гиннес рекордини қайд этган сунъий порт ҳавзаси ҳам мавжуд.
Шунингдек, портда юкларни қабул қилиш ва сақлаш учун умумий майдони 9,2 миллион квадрат метр бўлган ҳудудлар ташкил қилинди. Янги обьектлар фаолиятини таъминлаш мақсадида порт инфратузилмаси, муҳандислик ва коммунал тармоқлар ҳам модернизация қилинди.
Транспорт инфратузилмаси ҳам кенгайтирилди. Хусусан, порт ичида 17 километрлик темир йўл тармоғи қурилиб, у Айн-Сохна - Янги Ал-Аламейн электрлаштирилган тезюрар темирйўл магистрали билан боғланди. Бу эса порт орқали юкларни денгиздан қуруқликка ва аксинча тезроқ етказиб бериш имкониятларини оширади.
Планет компанияси яқинда Айн-Сохна портидаги йирик қурилиш ва реконструксия ишлари қандай амалга оширилганини кўрсатувчи видеони ҳам эълон қилди. Лойиҳа якунида портнинг юк қабул қилиш ва ташиш имкониятлари сезиларли даражада кенгайиб, унинг халқаро денгиз логистикасидаги аҳамияти ортиши кутилмоқда.
Гиннес рекорди эса лойиҳада қўлланган муҳандислик ечимларининг кўламини намоён этади. Айн-Сохна портининг модернизация қилиниши Мисрнинг минтақавий ва халқаро савдо алоқаларини мустаҳкамлаш ҳамда мамлакатнинг йирик логистика маркази сифатидаги мавқеини кучайтиришга хизмат қилиши таъкидланган.