Микел Артета “Арсенал” билан янги шартнома бўйича келишувга эришди
Микел Артета “Арсенал” билан янги шартнома борасида келишувга эришди
“Арсенал” бош мураббийи Микел Артета клуб билан янги шартнома юзасидан оғзаки келишувга эришди. Янги битим испаниялик мутахассиснинг маошини сезиларли даражада оширишни ҳам кўзда тутади. Бу ҳақда Тҳе Атҳлетис хабар берди.
Артетанинг амалдаги шартномаси 2026/27-йилги мавсум охиригача амал қилади. Томонлар янги келишув бўйича музокараларни май ойида бошлаган, бироқ ёзги трансфер ойнаси пайтида жараён вақтинча тўхтатилган эди. Энди эса 44 ёшли мураббийнинг “Арсенал”да камида яна уч йил қолиши кутилмоқда.
Микелнинг янги шартномаси бўйича эришилган келишув мураббийнинг клубдаги келажаги юзасидан узоқ давом этган музокараларга якун ясайди. Испаниялик мутахассис аввалроқ “Арсенал”да қолишни исташини айтган ва томонлар албатта келишувга эришишига шубҳа йўқлигини билдирган эди.
Янги битимнинг аниқ муддати ҳозирча ошкор қилинмаган. Бироқ хабарларга кўра, шартнома Артетанинг “Арсенал”даги фаолиятини камида 2029-йилгача давом эттиришига имкон беради.
Артетанинг янги шартномаси клубнинг мураббийлар штабига ҳам тегишли бўлиши кутилмоқда. Унинг ёрдамчилари ва бошқа мураббийлар билан амалдаги келишувларни янгилаш жараёни ҳам давом этмоқда.
Маълумот учун, 44 ёшли Микел Артета 2019-йилдан буён “Арсенал”ни бошқариб келмоқда. У Лондон жамоаси билан Англия Кубоги, уч марта Англия Суперкубоги ҳамда ўтган мавсумда Англия чемпионлигини қўлга киритди ва клубга 22 йил кутилган кубокни олиб келди. Лондонликлар ўтган мавсумда Чемпионлар лигаси финалига ҳам етиб борди, бироқ ҳал қилувчи учрашувда “ПСЖ”га пеналтилар сериясида имкониятни бой берганди.
Бундан ташқари, Микел Артета 2025/2026-йилги мавсумда АПЛнинг энг яхши мураббийи деб топилган.