Миграция агентлиги 7 ойда Ўзбекистонга неча киши қайтарилганини маълум қилди

Миграция агентлиги маълумотларига кўра, жорий йилнинг дастлабки етти ойида хорижда оғир аҳволга тушиб қолган 2 888 нафар Ўзбекистон фуқароси ўз ватанига қайтарилди. Бу ҳақда агентлик матбуот хизмати 11-август куни хабар берди.

Ушбу фуқароларни қайтариш билан боғлиқ транспорт, тиббий, ташкилий ва бошқа зарур харажатлар учун Миграция жамғармасидан жами 9 миллиард 936 миллион сўм маблағ сарфланди.

Қайтарилган фуқароларнинг тоифаси қуйидагича:

* 1 306 нафари – молиявий қийинчиликларга дуч келган шахслар;

* 518 нафари – болали аёллар;

* 1 022 нафари – болалар.

Шунингдек, 42 нафар фуқаро махсус тиббий транспорт (ётқизилган ҳолда) орқали олиб келинган бўлса, тиббий кузатувга муҳтож бўлган 15 нафар фуқаро Соғлиқни сақлаш вазирлиги шифокорлари назорати остида ватанга қайтарилди.

Мисол тариқасида, 2024-йилда ишлаш мақсадида Санкт-Петербургга кетган бир эркакнинг 2026-йил март ойидан оиласи билан алоқаси узилган. Ўтказилган ўрганишлар натижасида унинг руҳий ҳолатида ўзгаришлар кузатилгани ва қаровсиз қолгани аниқланган. У Миграция агентлиги кўмагида Санкт-Петербург – Тошкент рейси орқали ватанга олиб келинган.

Эслатиб ўтамиз, 2026-йилнинг июл ойида Россиядан қарийб 600 нафар ўзбекистонлик ватанга қайтарилган эди. Шунингдек, 12-август куни Татаристонда дронлар ҳужуми оқибатида ҳалок бўлган 8 нафар фуқаронинг жасади Ўзбекистонга олиб келинди.