Месси ва футбол тарихини ўзгартириб юборган ВҲС видеокассетаси
Росариолик юлдуз Испания терма жамоасида ўйнаши мумкин эди, аммо биргина видеоёзув унинг тақдирини бутунлай ўзгартириб
**Месси ва футбол тарихини ўзгартириб юборган ВҲС видеокассетаси**
Росариолик юлдуз Испания терма жамоасида ҳам ўйнаши мумкин эди, бироқ битта видеоёзув унинг тақдирини бутунлай ўзгартириб юборди.
Мессининг Аргентина терма жамоасидаги афсонавий йўли бугун — Беннинга қарши ўртоқлик учрашуви билан якунига етади.
Лео аллақачон «албиселесте» рамзига, аргентиналиклар ва барча футбол ишқибозлари хотирасида абадий қоладиган афсонага айланган.
Лионел Андрес Месси Аргентинанинг Росарио шаҳрида туғилган. Аммо агар у Испания терма жамоасини танлаганида, унинг ҳаёти бошқача кечиши ҳам мумкин эди. Бу илмий-фантастик тахмин эмас, балки оддий ВҲС видеокассетаси сабаб йўққа чиққан ҳақиқий воқеа эди.
2003 йил декабрида 16 ёшли Лео Месси «Барселона»нинг ёшлар жамоаси (Жувенил А) футболчиси бўлиб, Портудаги ўртоқлик ўйинида асосий таркибда илк бор майдонга тушган эди. Унинг жамоадошлари (Пике, Сеск ва Виктор Васкес) мунтазам равишда Испания ёшлар терма жамоаларида ўйнашар ва уни ҳам ўз сафларига қўшилишга ундашарди.
Ёш Лео эса ўзини 100 фоиз аргентиналик деб биларди ва фақат миллий жамоасида тўп суришни истарди. Аммо муаммо шундаки, у 13 ёшида «Нюеллс»ни тарк этгани учун ватанда уни ҳеч ким танимасди ва «Албиселесте»нинг ёшлар жамоаларига ҳеч қачон чақирилмаган эди.
Шунда Леонинг отаси клуб матбуот хизмати ходимига мурожаат қилади:
«Хайме, бизга Месси “Барселона”да ўйнаётган ва гол ураётган кадрлар туширилган видео керак. Чунки уни ватанимизда ҳеч ким танимайди, сен эса у кимлигини уларга тушунтиришга ёрдам беришинг керак».
Хорхе Мессининг илтимоси бажарилади:
Барçа ТВ ёш истеъдоднинг рейдлари ва голлари жамланган тўпламни ВҲС кассетага ёзиб беради. Энди бу ёзувни Аргентина федерациясидаги масъулларга етказиш қолган эди. Бунинг учун имконият 2003 йил 27 декабрда Аргентина терма жамоаси Каталонияга қарши ўртоқлик ўйини учун Барселонага келганида пайдо бўлди.
Белса ўз кўзларига ишонмасди:
«Видеони одатий тезликда қўй, бундай тезликда кўриб бўлмайди».
Вивас эса видео жойида эканини айтади. Гап шундаки, кичкина Леонинг ниҳоятда юқори тезлиги шундай тушунмовчиликка сабаб бўлган эди.
«У феномен, бу болага бунчалик тез ҳаракат қилишни ким ўргатган?»
— дея ҳайратини яшира олмайди Белса.
Аргентина жамоаси ватанга қайтади ва Вивас видеокассетани Аргентинанинг 17 ёшгача бўлган ўсмирлар терма жамоаси мураббийи Уго Токаллига қуйидаги сўзлар билан топширади:
«Бу ўйинчини бой берманг, аргентиналик ва футбол мухлиси сифатида сиздан ўтиниб сўрайман».
Дастлаб Токалли бунга унча эътибор бермайди ва Финляндияда бўлиб ўтадиган ўсмирлар ўртасидаги Жаҳон чемпионатига олиб кетиладиган таркибдан бирор футболчини чиқариб ташлашни истамайди.
Аммо Финляндиядаги турнир ярим финалида Испания Аргентинани мағлуб этади. Ҳар икки жамоа бир меҳмонхонада яшаган ва Испания жамоаси ошпази Токаллига мурожаат қилиб шундай деган эди:
«Агар сизда “Барселона”да ўйнайдиган ўша йигит бўлганида, бу жамоа билан чемпион бўлардингиз...»
Токалли ундан Лео Мессини назарда тутяпсизми, деб сўрайди. Бунга жавобан ошпаз ҳайратга тушади:
«Нима? Уни билиб туриб олиб келмадингизми?!»
Токалли шунчаки таркибни ўзгартиришни истамаган эди, бироқ юз берган воқеалардан кейин у видеокассетадаги ёзувни қайта кўриб чиқади. Аргентинага қайтгач, Аргентина футбол ассоциацияси ходимига Леони жамоага жалб қилиш учун унинг оиласи билан боғланишни буюради.
Бу вазифа Омар Соутога юкланади. У Росариодаги барча Мессиларни қидириб, телефон китобини варақлайди. Қидирув чоғида у Лео исмининг қисқартмаси деб ўйлаб, аввал Леонардо исмли шахсларни суриштиради. Ниҳоят, Леонинг бувиси Селия, кейин эса тоғаси билан боғланади ва улар орқали футболчининг отаси Хорхе Мессини топади.
Ота телефон орқали қувончдан қичқириб юборади:
«Ҳа, у Лионел! Ниҳоят уни чақиришибди-да! Ўғлим Аргентина учун ўйнашни жуда хоҳлайди!»
Аргентина футбол ассоциацияси «Барселона»га терма жамоанинг расмий чақирув хатини юборади. Қизиғи, унда футболчининг исми
«Леонел Меччи» деб хато ёзилган эди. Улар ҳатто унинг исмини қандай тўғри ёзишни ҳам билишмасди. Шу тариқа улар келажакда Аргентина ва жаҳон футболи тарихида Марадонанинг ворисига айланиши керак бўлган улкан ўйинчини миллий жамоага чақиришган эди.
2004 йил июнида 17 ёшли Месси Аргентинанинг 20 ёшгача бўлган ёшлар терма жамоаси сафида Парагвайга қарши баҳсда дебют қилади. Якунда унинг феноменал ўйинлари эвазига Аргентина ёшлар ўртасидаги Жаҳон чемпионатида ғолиб чиқади. У финалда жамоасининг иккита голига ҳам муаллифлик қилади, турнир тўпурари ва энг яхши ўйинчиси бўлади.
Испания федерацияси ҳам бу ўсмирни «рохита» футболкасида кўришни жуда истарди, аммо Леонинг ўз ватанига садоқати ва оддий ВҲС видеокассетасининг ижобий таъсири унинг тақдирини бутун умрга «Албиселесте» билан боғлади.
Унинг голлари, совринлари ва қолдирган улкан мероси абадийдир. Аммо ўша кичик видеотасма ва Хорхе Мессининг ташаббуси бўлмаганида, футбол тарихи бугун бутунлай бошқача ёзилган бўларди.