Мерс сайлов натижаларини «ҳалокат» деб атади
Германиянинг Мекленбург - Олд Померания федерал ери ва Берлин шаҳрида ўтказилган сайловлар канслер Фридрих Мерс бощилигидаги Христиан-демократик иттифоқ учун кутилганидан ҳам оғир якунланди. ХДИ тарихда илк бор федерал ерлардан бирининг парламентига кира олмади, бироқ Мерс истеъфога чиқиш нияти йўқлигини билдирди.
Мерс сайлов натижаларини «ҳалокат» деб атади
Германия канслери ва Христиан-демократик иттифоқ раҳбари Фридрих Мерс 20-сентабр куни Мекленбург - Олд Померания ҳамда Берлинда бўлиб ўтган сайловлар натижасини «ҳалокат» деб баҳолади. У бу гапни консерваторлар тарихда илк бор мамлакат федерал ерларидан бирининг парламентида вакиллик қила олмаслиги маълум бўлишидан олдин айтган.
Мекленбург - Олд Померанияда ХДИ атиги 4,9 фоиз овоз олди. Ер парламенти — ландтагга кириш учун эса партия камида 5 фоиз овоз тўплаши керак эди.
Сайловда 38,2 фоиз овоз билан ултраўнг «Германия учун муқобил» партияси ғалаба қозонди. Таққослаш учун, 2021-йилги сайловда бу партияни сайловчиларнинг 16,7 фоизи қўллаб-қувватлаган эди.
Иккинчи ўринни 35,5 фоиз овоз билан Германия социал-демократик партияси эгаллади. 2021-йилда унинг натижаси 39,6 фоиз бўлган. Сўл партия 6,5 фоиз, «Иттифоқ-90/Яшиллар» эса 5,7 фоиз овоз олди. Қолган сиёсий кучлар беш фоизлик тўсиқдан ўта олмади.
Шу тариқа, 2021-йилги сайловда ҳам қатнашган партиялар ичида фақат «Германия учун муқобил» ўз натижасини яхшилади. Бироқ бу ғалаба асосан рамзий аҳамиятга эга, чунки бошқа партиялар ултраўнглар билан коалиция тузишни истамаяпти.
Федерал ер ҳукумати раҳбари, социал-демократ Мануела Швезиг ўз сайловолди кампаниясини асосан «Германия учун муқобил»га қарши кураш ғояси асосида олиб борган эди. Унинг ташвиқот шиорларидан бири «Аёл кўкларга қарши» бўлди. Кўк ранг ултраўнг партиянинг рамзий ранги ҳисобланади.
Швезиг сайлов куни ЗДФ телеканалига берган интервюсида ултраўнглар обрўсининг ошишига икки асосий сабабни кўрсатди. Унинг айтишича, Мекленбург - Олд Померания аҳолисининг катта қисми Украинага молиявий ва ҳарбий ёрдам кўрсатилишига қарши. Шунингдек, кўпчилик «Шимолий оқим» қувури орқали Россия газини етказиб беришни қайта тиклашни хоҳлайди.
«Германия учун муқобил» партияси сайловолди кампаниясида айнан шу икки масаладан фаол фойдаланган. Швезиг социал-демократлар бу позицияларни қўллаб-қувватламаслигини ва шу сабабли овоз йўқотишини олдиндан тушунганини айтди.
Шунга қарамай, Швезигнинг стратегияси иш берди. Ой бошидаги сўровларда социал-демократларнинг рейтинги 30 фоиздан паст эди, бир йил аввал эса ҳатто 20 фоизга ҳам етмаган эди. Якуний 35,5 фоизлик натижа партияга Сўл партия ва «Яшиллар» билан биргаликда ҳукумат тузиш имконини бермоқда.