Мерс ГуМни Германия хавфсизлигига таҳдид деб атади
Германия канслери Фридрих Мерс ўзи раҳбарлик қилаётган Христиан-демократик иттифоқи (ХДИ) ўнг қанотдаги «Германия учун муқобил» (ГуМ) партияси билан ҳамкорлик қила олмаслигини билдирди. У бунга ГуМ вакилларининг Россия ҳукумати билан яқин алоқалари, шунингдек, партиянинг Европа Иттифоқи ва НАТОга нисбатан позициясини сабаблардан бири сифатида кўрсатди.
Мерс ГуМни Германия хавфсизлигига таҳдид деб атади
Германия канслери Фридрих Мерс 27-август куни РТЛ телеканалидаги дастурда ХДИ ва ГуМ ўртасида ҳамкорлик қилиш имкониятини инкор этди.
Мерснинг сўзларига кўра, ГуМ вакиллари Россиянинг Берлиндаги элчихонасига тез-тез бориб туради ва Россия расмийлари билан яқин алоқаларни сақлаб келади.
Канслер ХДИ ва ГуМ ўртасидаги келишмовчиликлар фақат Россия масаласи билан чекланмаслигини таъкидлади. У ГуМ вакилларининг ХДИни "йўқ қилиш" ва Германиядаги мавжуд сиёсий тизимни "бузиш" ҳақидаги баёнотларини ҳам эслатиб ўтди.
Шунингдек, Мерс ГуМнинг еврозона, Шенген ҳудуди ва Европанинг ягона бозоридан чиқиш тарафдори эканига эътибор қаратди.
"Европа Иттифоқидан қисман чиқиб бўлмайди, НАТОдан қисман чиқиб бўлмайди ва ХДИни ҳам қисман йўқ қилиб бўлмайди", - деди Мерс.
Унинг таъкидлашича, икки партия позициялари ўртасида "принсипиал" фарқлар мавжуд. Канслер ГуМ Германиянинг "ички ва ташқи хавфсизлигига таҳдид солаётганини" ҳам айтди.
Мерс бу баёнотларни Саксония-Анҳалтдаги ер парламенти сайловларига бир ҳафтадан сал кўпроқ вақт қолганида билдирди. Сўровларга кўра, ушбу ҳудудда ГуМ бошқа сиёсий партиялардан сезиларли даражада олдинда бормоқда.
Шу билан бирга, канслер сайловларда ГуМ ғалаба қозонган тақдирда Саксония-Анҳалт ҳукумати қандай шакллантирилиши мумкинлиги ҳақида аниқ жавоб бермади.
Мерс 2024-йил кузида Тюрингия ва Саксонияда ҳам шунга ўхшаш вазият кузатилганини эслатди. Ўшанда ГуМ сайлов натижалари бўйича энг кучли сиёсий кучга айланган, аммо ҳукумат тузишга муваффақ бўлмаган.
2026-йил сентабрида Берлин, Мекленбург - Олд Померания ва Саксония-Анҳалтда ер парламентларига сайловлар ўтказилади. Сўровларга кўра, Мекленбург - Олд Померания ва Саксония-Анҳалтда ГуМ ҳозирча энг оммабоп партия бўлиб қолмоқда.