Мерседес-Бенз Германиядаги заводларидан бирини ёпиши мумкин
Мерседес-Бенз Германиядаги заводларидан бирини ёпиши мумкин
Мерседес-Бенз раҳбарияти, агар ходимлар харажатларни камайтиришга рози бўлмаса, Германиядаги заводлардан бирини ёпиб, ишлаб чиқаришни Шарқий Европага кўчириш ниятида эканини билдирди.
Нашрга кўра, компания раҳбарияти ходимларга бериладиган айрим тўловларни, жумладан таътил пули ва Рождество бонусларининг бир қисмини бекор қилишни, шунингдек, ҳафтасига 35 соатлик иш вақтини қайта кўриб чиқишни талаб қилмоқда.
Раҳбарият Германиядаги корхоналарда меҳнат харажатларининг юқорилиги компаниянинг рақобатбардошлигига салбий таъсир кўрсатаётганини таъкидламоқда. Бунга, хусусан, Мерседес-Бенз автомобиллари савдосининг, айниқса Хитой бозорида, пасайгани сабаб бўлмоқда.
Мерседес-Бенз бошқаруви аъзоларидан бири Германиядаги меҳнат харажатлари сезиларли даражада қисқартирилиши кераклигини, акс ҳолда компания Шарқий Европада янги завод қуриши мумкинлигини очиқ айтган.
Компаниянинг ишлаб чиқариш кенгаши эса бу каби баёнотларни “шантаж” ва “ўта жиддий таҳдид” деб атаган.
Ҳозирча айнан қайси завод ёпилиши мумкинлиги маълум эмас.
Шу билан бирга, Мерседес-Бенз Венгрияда ишлаб чиқариш қувватларини фаол равишда кенгайтирмоқда. Компаниянинг Кечкемет шаҳридаги заводи келажакда йилига 400 мингтагача автомобил ишлаб чиқариш қувватига эга бўлиши кутилмоқда.
Аввалроқ Мерседес-Бенз Гроуп бош ижрочи директори Ола Келлениус автоконсерн глобал хавфсизликка таҳдидлар сабаб ҳарбий маҳсулотлар ишлаб чиқаришга ўтиши мумкинлигини эълон қилган эди.