“Мени тушунадиган инсонга турмушга чиқаман”. 12 ёшида совчи келган ва саёҳатларга 70 минг доллар сарфлаган Зебо Раҳимова 23 ёшда

“Мени тушунадиган инсонга турмушга чиқаман”. 12 ёшида совчи келган ва саёҳатларга 70 минг доллар сарфлаган Зебо Раҳимова 23 ёшда

Актриса ва блогер Зебо Раҳимова 2-сентябр куни 23 ёшга тўлди. Шу муносабат билан, санъат оламидан вайнерликка ўтиб миллионлаб мухлислар меҳрини қозонган, дунёнинг сўлим гўшаларига саёҳат қилишни севадиган ҳамда уйқуси қаттиқлиги боис тонгда уйғотувчи ёрдамчи ёллаган ижодкорнинг ҳаётий ва ижодий йўлига тўхталамиз.

Зебо Раҳимова Тошкент шаҳрида таваллуд топган. У интервюларида оилада ягона фарзанд бўлгани боис эрка бўлиб улғайганини айтади.

“Ҳақиқий исмим Зебо эмас, Зебинисо”

— Ҳақиқий исмим Зебинисо. Исмим қўйилишининг кулгили тарихи бор: аслида Муниса бўлиши керак бўлган. Ойимнинг исмлари Моҳира. Қайнона-қайноталари “Ўзингиз исм қўяверинг”, дейишган. Шунинг учун онам ўз исмларига ўхшаш бўлгани учун Муниса қўяман, деб ният қилган эканлар. Туғилганимдан сўнг онам шифохонада эканликларида бобом гувоҳномамни олишга борганда нима исм қўйилиши эсларидан чиқиб қолган. Ўйлаб-ўйлаб ҳеч тополмаган эканлар.

Шунда ўша ердаги бир опа бобомдан онасининг исмини сўраб, шу исмни қўйишни маслаҳат берган. Навбатда турганларни куттирмаслик учун бобом ҳам: “Майли, шу исмни ёзиб қўяверинг, нима деб чақиришса, ўзлари билади”, деган эканлар. Шундан сўнг ойим йиғлаб, бобомдан аразлаб қолган экан. Шу билан Зебинисо бўлдим. Исмим ўзимга жуда ёқади, маъноси ҳам чиройли.

“Фақат онам актриса бўлишимга қаршилик қилмаган”

—Оилада ягона фарзандман. Актрисалик фаолиятини танлашимга бошида уйдагилар қаршилик кўрсатган. Биргина онам бу фикримни қўллаб-қувватлаганлар. Шу сабабли ҳам онам билан жуда яқинмиз. Умуман олганда, ота-онамни ҳаётдаги энг яқин дўстларим деб биламан. Қариндошлар ёки кўчадаги танишлар ҳеч қачон улар каби сирдош бўла олмайди.

Ёлғиз фарзанд бўлганим боис, ота-онам ишга кетганида уйда бир ўзим қолиб, ёлғизликка кўникканман. Шу сабабли ҳозир ҳам ёлғиз қолсам, ўзимни жуда хотиржам ҳис қиламан.

“Биринчи совчи 12 ёшимда келган”

— Ўзбекистонда ўзи оқ, кўзлари кўк қизларнинг харидори кўп бўлади. Шунинг учун бўлса керак, биринчи совчи 12 ёшимда келган. Ундан сўнг 18 ёшимда уйдагилар яхши оиладан келган совчиларга мени турмушга беришмоқчи бўлишди. Ҳар томонлама сўраб-суриштиришса, бола бизга тўғри келмайди экан. Буларни билган ота-онам мени мажбурлашгани учун кейинчалик афсусланишган. Агар ўша вақтда шу инсонга турмушга бериб юборишганда, бугун ота-онам менинг олдимда жуда ҳам айбдор бўлиб қолишган бўларди. Шуларни тушуниб етганидан кейин улар қарорни ўзимга қўйиб беришди. Шунда ҳамма масъулият ўзингнинг бўйнингда бўлади, дейишди.

“Дадамга журналист бўламан, деганман”

— Актрисалик курсларига қатнай бошлашдан аввал дадамдан бошловчи бўламан деб рухсат олганман. Дадамга: “Журналистлар тез машҳур бўлиб кетмас экан. Машҳур актриса бўлиб танилиб олсам, кейин журналистикага ўтиб кетаман. Шундан кейин бошловчилик қилсам ҳамма билади, кўрсатувларга олишлари осон бўлади, тўйларга чақиришади”, деганман. Шундай деб у кишини актёрлик мактабига боришга кўндирганман. Кейинчалик “журналистларни тайёрлайдиган мактаб йўқ экан, актёрликда қолақолай, иккиси ҳам ўхшаш касб-ку”, деганман. Рози бўлганлар.

Бошида сериал сёмкаларида ўзлари ҳам қўшилиб мен билан юрганлар. Чунки актёр ва актрисалар ҳақида ҳар хил ёмон гаплар эшитган, бу касб эгаларининг интервюларини кўрганлар. Шунинг учун ўзлари олиб бориб, суратга олиш жараёнларини кўриб турардилар. Кейинчалик дадамнинг кимгадир: “Мундоқ қарасам, санъат одамларидан тоза одам йўқ экан. Ҳамма ўзининг ишини билиб қилиб юрибди. Ҳеч кимнинг биров билан иши йўқ, қолаверса аёллар кўп бўлар экан”, деганларини эшитганман. Шундай қилиб, кейинчалик қизим ёмон касб танламаган экан, деб тушуниб етганлар.

“Биринчи ролимни ижро этганимда талаба эмас эдим”

— Институтга қабул қилиниш учун бир йил давомида актёрликдан дарс олганман. Биринчи устозим Заҳро Мирзаева бўлган. Улар “Фолбин” сериалининг бош қаҳрамонига кастинг эълон қилингани ҳақидаги хабар юборган. Ташкилотчиларга ёзганман, расмимни жўнатганман, борганман. Бош қаҳрамон ролига тасдиқланиб, кинодаги биринчи фаолиятимни шу лойиҳадан бошлаганман. 42 қисмли сериал мен учун жуда катта тажриба бўлган.

Суратга олиш жараёнларидан тортиб монтажигача кузатардим. Дубляжида ҳам “овозим ёқимсиз эшитилмаяптимикан”, деб қайта-қайта эшитиб чиқардим. Ушбу сериал менга омад олиб келган. Шундан сўнг танила бошлаганман ва теленовеллаларга ҳам таклифлар туша бошлаган. Шуни ҳам айтиб ўтишим керак, бу сериалдан пул олмаганман. Бошидан охиригача текинга хизмат қилганман. Ҳатто баъзи қисмлари бувимнинг уйида ҳам суратга олинган. Бувим уйлари тўзиб кетганини айтиб менга танбеҳ берсалар ҳам бунга чин кўнгилдан рози бўлганман.

Блогерликни эса 2022-йилда бошлаганман. Блогерлар ташкилотига борганда Умид ака билан танишдик ва бирга контентлар ишлай бошладик.

“Ота-онам олиб берган Спаркъни тўйларда бошловчилик қилиб, Гентраъга ўзгартираман, деб ўйлардим”

— Кўпчилик “орзуларимга етишиш учун уларни қайта-қайта тасаввур қилдим, орзулар харитасини тузиб чиқдим”, дейди. Мен бунчалик орзу қилолмасдим. Аллоҳ ўйлаганимдан ҳам анча кўпроғини берди. Иш бошлашимдан олдин ота-онам ҳайдовчилик гувоҳномасини олганимдан сўнг, бўлиб тўлаш эвазига Спарк совға қилишмоқчи бўлишган. Тахминан, ниятимиз шундай эди. Чунки у пайтда блогер бўлиш ниятим йўқ эди.

Аксинча, ҳеч қачон блогер бўлмайман, дердим. Чунки бизларга институтда бошқача тарбия беришарди. Блогерларни жуда ёмон қилиб кўрсатишарди. “Улар профессионал эмас, бу касбнинг келажаги йўқ”, дейишарди. Шунинг учун мен актриса бўламан, сўз бойлигимни ошириб тўйларда бошловчилик қиламан. Шу орқали даромад қилиб уйимдагилар олиб берган Спаркъни Гентраъга алмаштираман, деб ўйлардим. Лекин Аллоҳ кутганимдан-да ортиғини тайёрлаб қўйган экан. Ҳали ҳайдовчиликка ўқимай туриб, биринчи марта 19 ёшимда ўзим учун Киа харид қилдим. Ундан кейин ота-онамга ҳам машина совға қилдим. Ўзим учун Мерс олганимга ҳам бир йил бўлиб қолди, дейди актриса.

“Келажакда мени тушунадиган инсонга турмушга чиқишни хоҳлайман”

Фото: Инстаграм

—Келажакда касбимни тушунадиган ва ишлашимга рухсат берадиган инсон билан оила қуришни истайман. Чунки касбимни жуда ҳам яхши кўраман. Қолаверса, ота-онам кексайганида кимнингдир қўлига қараб қолишини, бўлажак турмуш ўртоғим уларга қилган ёрдамини миннат қилишини хоҳламайман. Бўлажак умр йўлдошим яхши инсон бўлишига ишонсам-да, барибир молиявий жиҳатдан мустақил бўлиш тарафдориман, дейди у.

“Эрталаб уйғотиши учун алоҳида ищи олганман”

— Жуда ҳам уйқуни яхши кўрадиган одамман. Эрта туриб, ҳамма ишларимга улгуришнинг зўр ечимини топдим. Ҳар куни эрта тонгда келиб, мени уйғотиб кетадиган ищи олганман. Уйқум қаттиқлиги учун “будилник” ҳам уйғота олмайди. Ойим уйғоцалар ҳам, уйғонмайман. Чунки битта фарзанд бўлганим учун эркаман. Бегона одам келиб уйғоца, уялганингиздан ҳам уйқунгиз очилади. Шу даражада уйқум яхши бўлгани учун чет давлатга кетишда ҳам қийналмайман — самалётга чиқишим билан ухлаб, манзилга етганда уйғонаман.

Ищим ўзимнинг келинойим бўлади. Уйлари бизники билан ёнма-ён. Бир куни улар ишдан бўшади. Кейин уларга моддий томондан ёрдам бергим келди. Шундоқлигича пул берсам, келинойимнинг ҳам ғурурига тўғри келмайди. Шунинг учун ўзимга нима керак бўлса, шуни ўйлаб, “эрталаб келиб, мени уйғотиб кетинг, кейин мен сизга ойлик бераман”, дедим, дейди Зебо Раҳимова.

“Ўзимни қурбон қилиб кўрсатишдан қўрқаман”

—Ҳаётда қийинчиликка учрасам ҳам, ўзимни бахциз ва жабрдийда қилиб кўрсатишдан қочаман. Одамлар менга ачинганидан эмас, балки яхши кўрганидан кузатишларини истайман. Саҳифамни кузатувчиларида менга нисбатан раҳм-шафқат ҳисси уйғонишини хоҳламайман. Мақсадим — уларга фақат яхши кайфият улашиш. Шу сабабли ижтимоий тармоқларда йиғлаб ёки ҳаётдан нолиб сторис жойламасликка ҳаракат қиламан, дейди вайнер.

“Вайнларда ҳамма билан шерик бўлишни хоҳламайман”

—Ижодий шеригим Умид Эшонқулов билан тўрт йилдан буён бирга вайн суратга оламиз. Шу пайтгача майда тушунмовчиликлар бўлган бўлса-да, ўзаро тил топишиб, яқин дўстлардек ишлаймиз. Блогерликни бошлаган вақтимдаёқ ҳар хил йигитлар билан вайн олмасликни мақсад қилгандим. Бошида бошқа блогерлардан кўплаб таклифлар тушган, аммо уларни рад этганман. Чунки тез-тез партнёр алмаштириш ҳурматимни тўкиб юборади, деб ўйлаганман. Шу сабабли фақат ҳар сафар фақат битта партнёр — Умид ака билан ишлаймиз.

“Энг катта шартномамизни уй қурувчи компания билан тузганмиз”

Зебо Раҳимова биринчи марта реклама учун олган гонорарини эслар экан, ўша пайтда бу жараён ўзи учун жуда ҳайратланарли бўлганини айтди.

— Бошида теленовеллаларга 200 минг сўмдан чиқар эдим. Кейин 300 минг бўлди. Шу билан охирги иштирок этган теленовеллам учун бир миллион олганман. Шундан буён, деярли икки йилдирки филмларда рол ижро этмадим. Бунга вақт ҳам бўлмаяпти.

Биринчи катта гонорарим тилла дўконининг рекламасидан бўлган. Ўшанда ижтимоий тармоқда сторис орқали реклама қилиш нархини 50 доллар этиб белгилаб қўйгандик. Шунда қўлимизга 600 минг сўм тегган. Кейинчалик техника буюмлари билан шуғулланувчи дўкон билан шартнома имзолаганмиз. Ойига 12 та видео ишлаш эвазига 1200 доллар олардим. Шундан сўнг шампун ишлаб чиқарувчи компания билан ойига 15 минг долларлик келишув қилдик ва шунча даромад топа бошладим. Шу вақтга қадар олган энг катта гонорарим уй бўлган. Битта шартномада иккита уйга келишилгани учун жуда хурсанд бўлганман. Худди шу уй қурувчи компания билан иккинчи марта ҳам шу асосда шартнома туздик. Иккита дейишимизга сабаб биз икки кишимиз. Умид ака билан топган пулимизни тенг иккига бўлишамиз, дейди у.

“Саёҳатлар учун деярли 70 минг доллар сарфладик”

— Шу вақтга қадар 28 та мамлакатга саёҳат қилдик. Сафарларимизнинг биринчиси умра зиёратидан бошланган. Ота-онам билан биргаликда борганман. Умумий олганда 70 минг долларни саёҳатларга сарфлабмиз. Бу икки киши учун, яъни мен ва Умид ака учун сарфланган маблағ. Бу пулга, тахминан, 12-13 та тўйни ўтказса ёки 4-5 та автомобил сотиб олса бўлади. Саёҳат инсоннинг дунёқарашини оширар экан. Биз билан фақат хотираларимизгина қолади, дейди Зебо Раҳимова.