“Мен унинг энг кучли ўйинига қарши тайёргарлик кўряпман”— Синдоров Жаҳон тожи учун беллашув ҳақида
“Мен унинг энг кучли ўйинига қарши тайёргарлик кўряпман”— Синдоров Жаҳон тожи учун беллашув ҳақида
Ўзбекистонлик гроссмейстер Жавоҳир Синдоров амалдаги Жаҳон чемпиони Гукеш Доммаражуга қарши бўлажак баҳс олдидан рақибининг сўнгги натижаларига эмас, пухта тайёргарликка эътибор қаратмоқда.
20 ёшли Синдоров 2026-йилги даъвогарлар турнирида ғолиб чиқиб, Жаҳон чемпионлиги учун баҳсда иштирок этиш ҳуқуқини қўлга киритди. У Жаҳон кубогида ҳам ғалаба қозонди.
Ўзбекистонлик шахматчи Гукешнинг сўнгги турнирлардаги натижалари унинг имкониятларини тўлиқ акс эттирмаслигини таъкидлаб, асосан ўз ўйинига эътибор қараташини айтиб ўтди.
“Гукеш жуда кучли шахматчи. Мен у билан бир неча марта ўйнаганман ва унинг кучини яхши биламан. Баҳс олдидан кўп нарса айтишни истамайман. Мен шунчаки ўзимнинг энг яхши ўйинимни кўрсатиб, баҳсдан завқ олишни хоҳлайман”, деди Синдоров.
Жаҳон чемпионлиги учун баҳс 25-ноябрдан 15-декабргача Женевада бўлиб ўтади. Икки шахматчи 14 та классик партияда куч синашади. Гукеш ва Синдоров 20 ёшда бўлгани сабабли, бу тарихдаги энг ёш шахматчилар иштирокидаги чемпионлик баҳси бўлади.
Гукеш 2024-йилда Жаҳон чемпионлигини қўлга киритганидан кейин барқарор натижалар қайд эта олмаётгани кўп муҳокама қилинмоқда. Бироқ Синдоров рақибининг сўнгги турнирлардаги ўйинларига ортиқча эътибор қаратмаётганини таъкидлади:
“Жаҳон чемпионлиги учун баҳсда у бутунлай бошқача ўйнаши мумкин. Мен унинг энг кучли ўйинига қарши тайёргарлик кўряпман”.
Синдоров Женевадаги баҳсга мураббийи Роман Видоняк бощилигида тайёргарлик кўрмоқда. Гроссмейстер аввалги муваффақиятли тайёргарлик усулларини тубдан ўзгартирмоқчи эмас.
“Биз ҳамма нарсани ўзгартирмаймиз. Аввалги турнирларда қўллаган усулларимиз ўз самарасини берди. Энди уларни янада такомиллаштирамиз”, деди ўзбекистонлик гроссмейстер.
Маълумот учун, Жавоҳир Синдоров Жаҳон чемпионлиги учун баҳс олдидан Глобал Чесс Леагуе мусобақасининг тўртинчи мавсумида иштирок этади. Шунингдек, у Самарқандда ўтказиладиган 46-Бутунжаҳон шахмат олимпиадасида Ўзбекистон терма жамоаси сафида қатнашади.