Меган Маркл жанжал сабабли Гай Ричининг сериалидаги ролидан айрилди

Меган Маркл жанжал туфайли Гай Ричининг "Жентлменлар" сериалидаги ролидан маҳрум бўлди.

Тенгри Лифе Тҳе Индепендент нашрига таяниб хабар беришича, Меган Маркл Гай Ричининг Нетфлихъдаги "Жентлменлар" сериалининг учинчи мавсумида иштирок этмаслиги мумкин.

**Нима бўлди?**

Ванитй Фаир ва Нев Ёрк Магазине журналларининг собиқ бош муҳаррири Тина Брауннинг сўзларига кўра, Марклнинг лойиҳадаги иштироки ҳақидаги қарор Буюк Британияда юзага келган кескин муносабатлардан сўнг қайта кўриб чиқилган.

Аввалроқ Сассекс герсогиняси Нетфлих сериалининг янги мавсумида актёрликка қайтиш бўйича музокаралар олиб бораётгани ҳақида хабар берилганди. Бу янгилик Британия оммавий ахборот воситаларида қизғин муҳокамаларга сабаб бўлди, энди эса бу ғоядан воз кечилгани ҳақида маълумот пайдо бўлди.

Тина Браун ўзининг Субстаск саҳифасида режалар ўзгарганини маълум қилди. У шундай ёзди: “Бугун эрталаб Гай Ричи сериалининг учинчи мавсуми учун Меган Маркл билан ўтказилиши керак бўлган кастинг бекор қилинганини билдим”.

Унинг сўзларига кўра, бунга Марклнинг лойиҳада иштирок этиши мумкинлигига билдирилган муносабат сабаб бўлган. Браун қўшимча қилди: “Буюк Британиядаги салбий муносабат шу қадар кучли эдики, ишни давом эттиришнинг иложи қолмади”.

Шу билан бирга, на Нетфлих, на Меганнинг ўзи, на Гай Ричи бу маълумотни расман тасдиқлаган.

**Бу нега бундай муносабатга сабаб бўлди?**

Аввалроқ Меган Марклнинг “Жентлменлар” сериали учинчи мавсумидаги роллардан бирига номзоди кўриб чиқилаётгани хабар қилинган эди. Вариетй нашри маълумотларига кўра, актриса сериал ижодкорлари билан музокаралар олиб борган. Янги мавсумни Буюк Британияда суратга олиш, бош ролларни эса Тео Жеймс ва Кая Скоделарио ижро этиши режалаштирилганди.

Шу билан бирга, учинчи мавсум ҳали Нетфлих томонидан расман тасдиқланмади. Иккинчи мавсум эса 3-сентябр куни платформада намойиш этилади.

Марклнинг “Жентлменлар” сериалидаги эҳтимолий ролга қизиқиш унинг актёрлик фаолиятига қайтиши билан ҳам боғлиқ эди. 2017-йилда у шаҳзода Гарри билан унаштирилгач, актрисалик фаолиятини тўхтатган.

Бунгача Маркл етти мавсум давомида “Форс-мажорлар” сериалида Рейчел Зейн ролини ижро этган, шунингдек, “Баджаҳл хўжайинлар”, “3 кунда қандай турмушга чиқиш мумкин?” ва “Тасодифий учрашувлар” филмларида суратга тушган.

Тўғри, у яқинда экранга қайтди — бироқ кичик бир эпизод билан. Маркл “Яқин дўстлар” комедиясида ўз ролини ижро этди. Амазон МГМ студиясининг ушбу филмида Лили Коллинз ва Бри Ларсон ҳам рол ўйнаган. Бу унинг қарийб ўн йил ичида экранда илк бор кўриниш бериши бўлди.

Сериалдаги эҳтимолий рол ҳақидаги миш-мишлар Меган Маркл ва шаҳзода Гаррининг АҚШдан Буюк Британияга кўчиб ўтиши тўғрисидаги хабарлардан сўнг ОАВда пайдо бўлди. Ота-онаси билан бирга уларнинг фарзандлари — шаҳзода Арчи ва малика Лилибет ҳам мамлакатга қайтиши керак. Хабарларга кўра, улар Британия мактабларида ўқийди.

Тина Брауннинг ёзишича, Марклнинг Буюк Британиядаги актёрлик лойиҳаси ушбу қарорнинг сабабларидан бири бўлиши мумкин эди. Агар унинг кастинг бекор қилингани ҳақидаги маълумоти тасдиқланса, актрисага Британия кино саноатидаги фаолиятига доир режаларини қайта кўриб чиқишга тўғри келади.

**“Жентлменлар” ҳақида нималар маълум?**

“Жентлменлар” сериали — Гай Ричининг 2019-йилда Метю Макконахи, Чарли Ханнем ва Колин Фаррелл иштирокида суратга олинган шу номдаги филмида бошланган ҳикоянинг давомидир. Шу билан бирга, сериал филм сюжетини такрорламайди: унда ўша жиноий-комедик оламда янги қаҳрамонлар ва алоҳида ҳикоя пайдо бўлган.