Марказий Осиё энергетика тизимида ўзаро боғлиқ узилишлар кузатилди
Ўзбекистоннинг Сурхондарё ва бошқа айрим вилоятларида, шунингдек қўшни мамлакатларнинг Олмаота, Бишкек ва Душанбе шаҳарларида электр таъминоти узилиб қолди.
Марказий Осиё энергетика тизимида бир-бирига боғлиқ узилишлар юз берди. Минтақанинг ягона энергетика тизимига таъсир кўрсатган авария натижасида Ўзбекистоннинг Сурхондарё ва бошқа айрим вилоятларида электр таъминоти узилди.
Ўзбекистон Энергетика вазирлиги авария қайси мамлакатда содир бўлганини ошкор этмаган ҳолда бу ҳақда маълум қилди. Вазирлик хабарида айтилишича, "Ҳозирги вақтда энергетиклар томонидан электр таъминоти босқичма-босқич тикланмоқда. Қўшимча маълумот берилади".
"Ўзбекистон миллий электр тармоқлари" АЖ маълумотига кўра, ягона энергетика тизимида бир неча поғонали аварияга қарши автоматика тизими ишга тушган.
Kaktus.media нашрининг ёзишича, Қирғизистон пойтахти Бишкек, Қозоғистоннинг энг йирик шаҳри Олмаота ва Тожикистон пойтахти Душанбеда электр энергиясидаги оммавий узилишлар ҳақида хабарлар мавжуд.
Тенгриневс хабарига кўра, КЕГОС компаниясига тегишли электр узатиш тармоқларида аварияга қарши автоматика тизими 300 МВт қувват билан ўчган, бунинг натижасида Олмаота шаҳри ва Олмаота вилоятидаги 10 та туманда электр таъминоти узилиб қолган. Шаҳарда метро ҳаракати тўхтаб қолгани ҳам айтилмоқда.