Марадонанинг ўлимида айбланаётган шифокорлар 25 йилга қамалиши мумкин
Марадонанинг ўлимида айбланаётган шифокорлар 25 йилгача қамоқ жазосига ҳукм қилиниши мумкин.
Аргентиналик марҳум футбол афсонаси Диего Марадонанинг ўлими бўйича ўтказилаётган суд мажлисида тиббиёт ходимларининг масъулияцизлигига оид янги тафсилотлар ошкор этилди.
Буенос-Айресда бўлиб ўтган суд мажлисида нефролог Эрнан Тримарчи Марадонани даволаган шифокорлар унинг буйрагидаги жиддий муаммолар ва сурункали касалликларга ўз вақтида эътибор қаратмаганини маълум қилди. Мутахассиснинг таъкидлашича, футболчининг буйраклари катталашиб кетгани семизлик, кокаин ва юқори қон босимидан азият чеккан бемор учун жиддий хавф сигнали бўлиши керак эди.
“Бундай ҳолатда бемор ҳар куни кўрикдан ўтказилиши, доимий ҳамшира назоратида бўлиши ва ундан мунтазам қон таҳлиллари олиниши шарт эди”, дейди Тримарчи.
Бироқ, унинг қўшимча қилишича, Марадонанинг икки ҳафталик даволаниш даврида ундан бирор марта ҳам қон таҳлили олинмаган. Қолаверса, бемор танасининг шишиб кетиши ва қон босими ўзгаргани ҳам шифокорларни хавотирга солмаган.
Суддагиларга футболчининг ўлими арафасида олинган суратлари ҳам намойиш этилди. Унда Марадонанинг қорни шиш туфайли ғайритабиий даражада катталашиб кетганини кўриш мумкин. Суд-тиббий экспертизаси хулосасига кўра, футболчи ўлимидан олдин бир неча соат давомида қаттиқ азоб чеккан. Эрнан Тримарчи шифокорларнинг бу каби жиддий хатоларга йўл қўйганини тасдиқлаган учинчи мутахассис бўлди.
Маълумот учун, 1986-йилги Жаҳон чемпиони 2020-йил 25-ноябрда, мия жарроҳлигидан сўнг ижарага олинган уйда 60 ёшида вафот этган эди. Агар шифокорларнинг айби исботланса, 25 йилгача қамоқ жазосига ҳукм қилиниши мумкин. Суд жараёни камида сентябр ойигача давом этади.