“Манчестер Сити” “Барселона” футболчисини сотиб олиши мумкин — Эл Насионал
“Эл Насионал” нашрининг хабар беришича, “Манчестер Сити” “Барселона” футболчисини сотиб олиши мумкин.
“Барселона” Родрини ўз сафига қўшиб олганидан сўнг, клубнинг трансфер режалари сезиларли даражада ўзгарди. Эндиликда бир қатор футболчилар, жумладан, жамоанинг баъзи етакчилари ҳам клубни тарк этиши кутилмоқда.
Каталонияликлар билан хайрлашиши мумкин бўлган асосий номзодлардан бири Френки де Ёнгдир. Нидерландиялик футболчига “Ювентус” томонидан жиддий қизиқиш бўлаётгани ҳақида хабарлар тарқалган эди. Бунинг сабаби Родри келганидан сўнг Де Ёнгнинг клубдаги келажаги ноаниқ бўлиб қолмоқда.
Бироқ, таниқли инсайдер Маттео Моретто Де Ёнгнинг Турин клубига ўтиши ҳақидаги миш-мишларни қатъиян рад этди. Журналистнинг таъкидлашича, бу хабарлар ҳеч қандай асосга эга эмас. Қолаверса, футболчи айни пайтда оғир жароҳатдан тикланмоқда, бу эса унинг ёзги трансферлар ойнасида бошқа жамоага ўтиш эҳтимолини деярли йўққа чиқаради.
“Эл Насионал” нашри нидерландиялик яримҳимоячига “Манчестер Сити” жиддий қизиқиш билдираётганини маълум қилди. Хабарга кўра, инглиз клуби раҳбарияти Де Ёнг жароҳатидан тўлиқ фориғ бўлганидан сўнг — тахминан жорий йилнинг охирига бориб, унга манфаатли таклиф билан чиқишга тайёргарлик кўрмоқда.
Маълумот учун, 29 ёшли Де Ёнг ўтган мавсум барча мусобақалар доирасида жами 38 та учрашувда майдонга тушди. Нидерландиялик футболчи ушбу ўйинларда 1 та гол ҳамда 8 та голли узатмага муаллифлик қилди.