Мактаб ўқувчиларидан бошланган норозилик Франсияда оммавий намойишларга айланди
Франсияда таълимга оид талаблар билан бошланган норозилик аксияларига талабалар, касаба уюшмалари ва фермерлар ҳам қўшилди. 17-октабрдаги намойишларда турли ҳисобларга кўра, 500 мингдан 800 минггача киши қатнашган. Айрим шаҳарларда тартибсизликлар юз бериб, мамлакат бўйлаб 2000 дан ортиқ киши ушланган.
Мактаб ўқувчиларининг норозилиги Франсияда оммавий намойишларга айланиб кетди
ДВ хабарига кўра, Франсия президенти Эммануел Макрон 18-октабр кечқурун аҳолига қилган мурожаатида талончилик, вайронкорлик ва полиция ходимларига нисбатан зўравонликни қоралади.
«Нега франсузлар Франсияга бундай қилмоқда?» — деди президент тартибсизликларда қатнашганларнинг хатти-ҳаракатларига муносабат билдирар экан. У вайронкорлик ва талончилик қилганлар етказилган зарарни қоплаши лозимлигини айтди.
Шу билан бирга, Макрон намойищилар кўтараётган муаммолар — турмуш харажатларининг ошиши, реал иш ҳақининг пасайиши ва таълим тизимидаги вазиятга ҳам тўхталди. У ҳукумат яқин кунларда аҳоли билан мулоқот қилиб, ечимлар устида ишлашини ваъда қилди.
«Ҳеч нарса бу зўравонликни оқламайди», — дея таъкидлади Франсия раҳбари.
17-октабрдаги аксиялар чоғида Парижда автомобиллар ва ўнлаб дўконларга зарар етказилди. Марселда тартибсизлик иштирокчилари мерия биносига бостириб кирган, Лионда эса шаҳар туристик офиси биносига ўт қўйилган.
Норозилик ҳаракати ўқув йили бошида мактаб ўқувчиларининг чиқишларидан бошланган эди. Улар таълим тизимини молиялаштиришни ошириш ва олийгоҳларга кириш синовларини ислоҳ қилишни талаб қилган.
Кейинчалик уларга талабалар, касаба уюшмалари, фермерлар ва «сариқ нимчалилар» ҳаракати иштирокчилари қўшилган. Талаблар ҳам кенгайиб, Франсиядаги бюджет инқирози фонида турмуш қимматлашишига қарши норозилик асосий масалалардан бирига айланган.