Макгрегор 2027-йилда Макс Холлоуейга қарши жанг қилиши мумкин

Конор Макгрегор 2027-йилда Макс Холлоуей билан жанг қилиши мумкин

Икки вазн тоифасида собиқ УФС чемпиони Конор Макгрегор келажакдаги режалари ҳақида маълум қилди ва Макс Холлоуейдан яқинда қабул қилиб олинган мағлубият учун реванш олиш ниятида эканлигини билдирди. Унинг сўзларига кўра, бу ирландиялик жангчининг УФСъдаги сўнгги жанги бўлади.

Макгрегор ўзининг Инстаграм саҳифасида 2027-йилги УФС Халқаро жанг ҳафталигига (ИФВ) ишора қилиб, қуйидаги хабарни қолдирди:

“Авлодларнинг энг зўр жанги бўлиши керак бўлган тўқнашув энди қайтадан ташкил қилинади. ИФВ 2027. Сўнгги рақс”.

Агар ушбу жанг расман тасдиқланса, бу Макгрегор ва Холлоуей ўртасидаги учинчи тўқнашув бўлади.

Жорий йилнинг 11-июл куни Лас-Вегасда (Невада штати) бўлиб ўтган УФС 329 турнирида 34 ёшли Холлоуей (28-9) 69 сония ичида техник нокаут эвазига ғалаба қозонган эди. Бунга учрашув дебютидаёқ Макгрегорнинг (22-7) ўнг тиззасидан жиддий жароҳат олгани сабаб бўлганди. Иккала жангчининг илк тўқнашуви эса 2013-йилнинг август ойида бўлиб ўтган бўлиб, ўшанда Конор ҳакамларнинг қарори билан зафар қучган.

Гарчи ирландиялик жангчи яқинда оёқ машқларини бажараётгани акс этган видеони ижтимоий тармоқларга жойлаган бўлса-да, УФС президенти Дана Уайт унинг аҳволи ҳақида тўхталиб: “Конор Макгрегор камида бир йилга сафдан чиқди”, дея таъкидлаган.

11-июл кунги учрашув Макгрегор учун сўнгги беш йилдаги илк жанг бўлди. Бунгача у УФС 264 турнирида Дастин Порьега техник нокаут билан ютқазганди. Маълумот учун, Конор ўзининг сўнгги учта жангида кетма-кет, охирги бешта учрашувнинг эса тўрттасида мағлубиятга учраган.

Макс Холлоуей эса жорий йилнинг март ойида ўтказилган УФС 326 турнирида Чарлз Оливейрага ҳакамлар қарорига кўра имкониятни бой берган бўлса-да, Макгрегорни мағлуб этиб, яна ғалабалар сериясини бошлади.