Лос-Анжелесда вертолётнинг ёниб кетиши билан боғлиқ ҳалокатда бир киши ҳалок бўлди
Маҳаллий оммавий ахборот воситаларининг хабар беришича, бу ўлим билан якунланган автобус ҳалокати содир бўлган жой яқинида учаётган янгиликлар вертолёти бўлган.
Лос-Анжелесда вертолёт ҳалокатга учраб, ёниб кетиши оқибатида бир киши ҳалок бўлди
Лос-Анжелес чеккасида вертолёт ҳалокатга учраши оқибатида камида бир киши ҳалок бўлди, деб хабар берди ўт ўчириш хизмати вакиллари.
Лос-Анжелес ўт ўчириш бошқармаси (LAFD) матбуот котибининг BBC’га маълум қилишича, ҳаво кемаси Чатсворт мавзесидаги иккита тижорат биноси оралиғига қулаши оқибатида яна уч киши жароҳатланган.
Воқеа жойидан олинган видеода иккита юк контейнери ва бир нечта транспорт воситаси ёнаётгани акс этган. Ўт ўчириш бошқармасининг билдиришича, ёнғин ўчирилган.
Ҳаво кемасини ким бошқаргани ҳозирча номаълум, бироқ маҳаллий ОАВ хабарларига кўра, бу одам ўлими билан боғлиқ автобус ҳалокати юз берган жой яқинида учаётган янгиликлар вертолёти бўлган.
LAFD капитани Бранден Силверман BBC’нинг АҚШдаги ҳамкори CBS телеканалининг маҳаллий филиалига шундай деди: «Бизда вертолёт қулаган вақтда унинг ташқарисида бўлган бир нафар жабрланувчи ҳақида тасдиқланган маълумот бор.
Ўша шахс воқеа жойида вафот этгани маълум қилинди. Ҳозирча вертолёт ичида қанча жабрланувчи ёки қанча одам бўлганини тасдиқламадик».
Лос-Анжелес полиция департаменти вертолёт уларга тегишли эмаслигини тасдиқлади.
Ҳалокат сешанба куни маҳаллий вақт билан соат 19:00 атрофида Лурлайн авенюси ва Нордхофф кўчаси кесишмасида юз берган.
Транспорт хавфсизлиги миллий кенгаши (NTSB) ушбу ҳодиса юзасидан терговга раҳбарлик қилади.