Лондон ҳайвонот боғида митти камёб қурбақаларнинг илк пушти дунёга келди
Афиа Бираго кўлмакли қурбақалари — Ганадаги ягона ўрмондан яқинда аниқланган турни ташкил этади.
Лондон зоопаркида жуда кичик камёб қурбақаларнинг илк пушти дунёга келди
Узунлиги тахминан 5 мм бўлган қурбақачалар қалам учининг ҳажмига тенг
Лондон зоопарки йўқолиб кетиш хавфи остида бўлган 15 та қурбақанинг дунёга келганини эълон қилиб, ушбу тур биринчи марта асирликда кўпайтирилганини билдирди.
Афиа Бираго кўлмак қурбақаси Ганадаги Атева-Хиллз ўрмон қўриқхонасидан келиб чиққан бўлиб, Лондон зоология жамияти (ZSL) маълумотларига кўра, у ерда атиги иккита кўлмакда омон қолган ва уларнинг иккаласига ҳам кончилик саноати хавф солмоқда.
2025 йилнинг сентябрь ойида Мутахассислар уларни қандай парвариш қилиш ва кўпайтиришни ўрганишлари, сўнгра бу тажрибани Ганадаги табиатни муҳофаза қилувчилар билан баҳам кўришлари учун Лондонга 20 та вояга етган қурбақа олиб келинган эди.
Қурбақачаларнинг узунлиги тахминан 5 мм ни ташкил этади, бу тахминан қалам учининг ҳажмига тенг.
Марказий Лондон зоопаркини бошқарадиган ZSL ташкилотининг рептилиялар ва амфибиялар бўйича куратори Бен Тапли шундай деди: "Улар бармоғингиз учига сиғадиган даражада кичик бўлиши мумкин, аммо уларнинг дунёга келиши ноаниқ келажакка дуч келаётган амфибиялар учун олдинга қўйилган жуда катта қадамдир".
ZSL маълумотларига кўра, бошқа ҳеч бир зоопарк ёки муассасада ушбу тур сақланмайди.
Олимлар бу турни илк бор фақат 2018 йилда тавсифлашган. Толиқ ўсганда, бу қурбақаларнинг вазни 1,75 граммдан камроқни ташкил қилади.
ZSL таъкидлашича, қурбақалар олиб келинганида улар ҳақида деярли ҳеч нарса маълум эмас эди, ва шундан бери назоратчилар кўпайтириш усулларини ишлаб чиқдилар. Ушбу усуллар энди Ганадаги CSIR ўрмон хўжалиги тадқиқот институтининг Кумасидаги кўпайтириш маркази билан баҳам кўрилмоқда.
Мақсад — Ганада вақти келиб табиатга қайтарилиши мумкин бўлган популяцияни шакллантиришдир.
Турни аниқлашга ёрдам берган ганалик табиатни муҳофаза қилувчи Калеб Офори-Боатенг унга онаси Афиа Бираго шарафига ном берган.
"Мен бу қурбақага онамнинг номини бердим, токи у кишининг мероси яшаб қолсин", деди у.
"Ушбу кўпайтириш дастури туфайли шундай бўлади ҳам. Онамнинг номи биз йўқотган эмас, балки сақлаб қолган тур билан боғланади."
Ушбу туғилишлар ўтган йилнинг ноябрь ойида зоопаркнинг худди шу ўрмондан келтирилган ва илгари асирликда ҳеч қачон кўпайтирилмаган яна бир йўқолиб кетиш хавфи остидаги тур — Атева сирпанчиқ қурбақасини кўпайтиришдаги муваффақиятидан сўнг юз берди.