Линдси Клэнсининг собиқ эри болаларининг ўлдирилиши учун уни нима сабабдан кечирганини тушунтирди
Уч нафар ёш боласини бўғиб ўлдирган америкалик онанинг турмуш ўртоғи CBS News телеканалига берган интервьюсида ўз қайғуси ҳақида гапирди.
Линдси Клэнсининг собиқ эри болаларининг ўлдирилиши учун уни нега кечирганини тушунтирди
Уч нафар фарзандини ўлдиришда айбланаётган АҚШлик онанинг собиқ эри Патрик Клэнси, агар хотинини болаларнинг ўлими учун кечирмаганида, бу туйғу уни "умрбод ич-ичидан кемириб битирган" бўлишини айтди.
CBS телеканалига берган интервьюсида у, шунингдек, собиқ рафиқаси Линдси Клэнси болаларни бўғиб ўлдирган кундан олдинги ойларда руҳий касаллик билан курашаётган пайтда қўлидан келган барча ишларни қилганини таъкидлади.
Линдси уларни ўлдирганини инкор этмаган, бироқ унинг адвокатлари у оғир руҳий касалликдан азият чеккани сабабли қонуний жавобгарликка тортилмаслиги кераклигини даъво қилишган.
Шу ой бошида ҳакамлар ҳайъати унинг қотилликда айбдорлиги бўйича бир овоздан қарорга кела олмаганидан кейин судья иш бўйича суд жараёнини ҳақиқий эмас деб эълон қилди.
Прокурорларнинг таъкидлашича, 2023 йил 24 январда Клэнси Массачусетс штатининг Даксбери шаҳридаги уйида барча фарзандларини — 5 ёшли Кора, 3 ёшли Доусон ва саккиз ойлик Калланни қасддан бўғиб ўлдирган.
Ҳозирда 36 ёшда бўлган Клэнси иккинчи қават деразасидан сакраб тушганидан кейин фалаж бўлиб қолган. У суд мажлисларида ногиронлар аравачасида қатнашди.
Линдси Клэнсининг ҳимоя гуруҳи унда туғруқдан кейинги психоз бўлганини айтди
Патрик Клэнси суд жараёнида собиқ рафиқасининг туғруқдан кейин руҳий саломатлиги ёмонлашгани ҳақида кўрсатма берди.
Клэнсининг ҳимоя гуруҳи унда туғруқдан кейинги психоз — туғруқдан кейинги аёлларда мания, депрессия ёки иккаласининг комбинацияси кузатилиши мумкин бўлган кам учрайдиган ҳолат бўлганини билдирди.
"Мен туғруқдан кейинги касалликни қандай бошқаришни билмасдим. Менимча, руҳий касаллик фожиали тарзда алдамчи бўлиш хусусиятига эга", деди у BBC'нинг АҚШдаги ҳамкори бўлган CBS телеканалига.
Кейинчалик Патрик Клэнсини уни кечиришга ундаган нарса айнан рафиқасининг руҳий саломатлиги бўлган.
"Мен 'Қотил она', 'Гўдаклар қотили', 'Махлуқ' каби сарлавҳаларни кўрдим. Ва уларнинг ҳеч бири ҳақиқатга тўғри келмасди", деди у интервьюда.
"Бунга унинг руҳий касаллиги сабаб бўлган деб ишонаман. Шунинг учун мен ўша сўзларни айтдим. Ва менимча, кечиримлилик ҳақида гап кетганда, агар мен бунга эришмаганимда, бу мени умрбод ич-ичидан кемириб битирган бўларди".
Қотилликларгача бўлган даврда бирор жиҳатдан муваффақиятсизликка учраганини ҳис қилганми-йўқми деган саволга у шундай жавоб берди: "Менимча, ўша пайтда қўлимда бори билан қўлимдан келган энг яхши ишни қилдим. Ва мен бу натижа билан яшаяпман. Мен ҳар куни шу билан яшайман".
Фожиадан кейинги ҳафталарда қайғу билан яшаш курашга айланди ва у ўз жонига қасд қилиш фикрлари бўлганини тан олди.
"Мен 35 ёшимни кўришгача яшайман деб ўйламагандим. Ва бу мен учун мутлақо нормал эди", деди у.
Етти ҳафталик суд жараёнида Патрик интернетда шиддатли нафрат ва жиноятни яширишда айбловлар нишонига айланди.
Қотилликларда қандайдир тарзда у айбдор эканлиги ҳақида даъволар пайдо бўлди. Диққат марказига тушиб қолган Патрикни таблоидлар саёҳат қилаётганда ва янги рафиқаси Рейчел Дэнис билан суратга олишди.
36 ёшли эркакнинг айтишича, бундай тахминлар "болаларимнинг хотирасига жуда катта зарар етказади. Бу ерда ҳақиқатан ҳам муҳим бўлган нарсадан — перинатал руҳий саломатликдан чалғитадиган катта омилдир".
Бу шахсан у учун ҳам "аламли" бўлган.
"Ва бу жамоатчилик орасида бўлишни қийинлаштиради ва эҳтимол, ўша одамларнинг баъзилари ёлғон устига ёлғонларни кўргандан кейин, бунга ишона бошлашади ва биз шундай вазиятда қоламиз", деди у.
Бундай кучли диққат-эътибор уни номаълумлик излаб Даксберидан Нью-Йорк шаҳрига кўчиб ўтишга мажбур қилди.
Ҳозирда у Дэнис билан оила қурмоқда ва келажакдаги фарзандларига уларнинг ака-опалари ҳақида гапириб беришни интиқлик билан кутмоқда.
"Менимча, ҳар бир ота-она қўшилиши мумкин, болаларингиз билан турлича муносабатларингиз бўлади, лекин уларнинг барчаси сизнинг болаларингиздир. Ва мен уларга акалари ва опаси ҳақида гапириб беришни интиқлик билан кутяпман".
Суд жараёнининг ҳақиқий эмас деб топилиши ишни ҳал қилинмаган ҳолда қолдирмоқда.
Прокурорлар қайта судлашни талаб қилиш-қилмасликларини маълум қилишмади.
Навбатдаги суд мажлиси 29 сентябрга Массачусетс штатидаги Плимут олий судида белгиланган.