Латвия Россия ва Беларусда ишлаб чиқарилган бир қатор товарлар импортини чеклади

Латвия Россия ва Беларусдан айрим маҳсулотлар импортини чеклади.

1-сентябрдан бошлаб Латвияда Россия ва Беларусда ишлаб чиқарилган маълум турдаги товарларни олиб киришга тақиқ жорий этилди. Бу чекловлар нафақат тўғридан-тўғри импортга, балки учинчи давлатлардан юбориладиган жўнатмаларга ҳам тегишли.

Тақиқланган маҳсулотлар рўйхатига китоблар, газеталар ва бошқа босма нашрлар киритилган. Шунингдек, кийим-кечак, поябзал, бош кийимлар, ўйинчоқлар, ўйинлар ва спорт анжомлари ҳам тақиқ остига тушди.

Делфи нашрининг хабар беришича, Латвия томонидан киритилган бу чекловлар Европа Иттифоқининг бошқа мамлакатларига тааллуқли эмас. Масалан, Россия ёки Беларусда ишлаб чиқарилган товарларни Литвадан Латвияга олиб киришга рухсат берилади. Бундан ташқари, ушбу икки давлат маҳсулотларини Латвия орқали Европа Иттифоқининг бошқа мамлакатларига транзит қилишга ҳам рухсат берилган.

Латвия Саеимаси (парламенти) тегишли ўзгартиришларни июл ойи охирида қабул қилган эди. Ҳукуматнинг таъкидлашича, бу тақиқдан мақсад мамлакат хавфсизлиги манфаатларини ҳимоя қилишдир. Шунингдек, бу чора Россия ва Беларуснинг экспортдан фойда олиш имкониятини камайтириш ҳамда Латвияга Россия тарғиботи материаллари оқимини чеклашга қаратилган.

Аввалроқ Латвия Россия билан алоқаларни узиш учун Европа Иттифоқидан 7 миллиард евро сўрагани ҳақида хабар берилган эди. Бу маблағ мамлакатнинг ортиб бораётган мудофаа харажатларини ва Москва билан иқтисодий алоқаларни тўхтатиш оқибатларини қоплашга йўналтирилади.