Ламин Ямал фаолияти давомида ирқчиликка “минглаб марта” дуч келганини айтди
Ламин Ямал фаолияти давомида ирқчиликка “минглаб марта” дуч келганини айтди
“Барселона” ҳужумчиси Ламин Ямал фаолияти давомида ирқчиликка “минглаб марта” рўбарў келганини, шунингдек, кўпчилик одамлар ўз сўзлари ёки хатти-ҳаракатлари ирқчилик эканини ҳатто англаб етмаслигини таъкидлади.
19 ёшли футболчи фаолияти давомида бир неча бор ирқчилик қурбони бўлган. Хусусан, 2024-йил октябрида “Сантяго Бернабеу” стадионида “Реал”га қарши ўйинда Ламин, Рафиня ҳамда Ансу Фатига нисбатан ирқчилик қилингани акс этган кадрлар тарқалган эди.
Испаниянинг ирқчилик ва ксенофобияга қарши кураш ташкилоти март ойида эълон қилган ҳисоботга кўра, Ламин ва Винисиус Жуниор 2025-йилнинг сўнгги чорагида Испанияда онлайн ирқчиликнинг энг кўп нишонига айланган футболчилар бўлган.
“Минглаб марта. Одамлар сизга нисбатан билвосита ирқчилик қилишади, бироқ буни ўзлари ҳам англаб етмайди. Уларнинг кўплаб гап-сўзлари ёки қарашларида ирқчилик яширинган бўлади, аммо буни пайқашмайди. Агар кимдир мени қора танли деса, бу умуман парвойимга келмайди. Ҳақиқатан ҳам мен қора танлиман, бошқа рангда эмасман. Бошқа масала шундаки, улар буни қандай мақсадда — мени ҳақорат қилиш учун айтмоқдами ёки йўқ. Лекин мен майдонда ўйнаётган бўлсам ва улар мени кўриш учун чипта сотиб олган бўлса, менга нисбатан шунчаки ҳурмацизлик қилишгани учунгина асабийлашиб ўтирмайман”.
Маълумот учун, Испания терма жамоаси вингери жорий мавсумда сермаҳсул ўйин кўрсатмоқда. У барча мусобақаларда 8 та гол урди ва 4 та голли узатмани амалга оширди.