Коррупцияга қарши курашиш агентлиги тиббиёт муассасаси раҳбари хотинини перинатал марказ бошлиғи этиб тайинлаганидан кейин текширув бошлади
Tashkent Times — Ўзбекистоннинг барча сўнгги янгиликларини ёритувчи инглиз тилидаги онлайн-газетадир
Коррупцияга қарши курашиш агентлиги тиббиёт бирлашмаси раҳбари хотинини перинатал марказига раҳбар этиб тайинлаганидан сўнг суриштирув бошлади
Тошкент тумани тиббиёт бирлашмаси раҳбари Ҳусан Асадов ўзи имзолаган буйруққа асосан хотини Гулнора Асадовани Туманлараро перинатал маркази раҳбари лавозимига тайинлади.
Ҳужжатда Асадова 12 октябрдан ишга олингани кўрсатилган. Ҳуқуқий асос сифатида Меҳнат кодексининг 122 ва 127-моддалари ҳамда унинг меҳнат шартномаси келтирилган.
Коррупцияга қарши курашиш агентлиги матбуот хизмати ушбу тайинлов бўйича расмий суриштирув бошланганини маълум қилди.
Тошкент вилояти соғлиқни сақлаш бошқармаси ҳам ушбу масалани ўз назоратига олганини билдирди.
Тегишли органлар томонидан мазкур ҳолат ўрганилмоқда. Меҳнат кодексининг 121-моддасига кўра, ўзаро яқин қариндошларнинг бевосита бўйсунуви ёки назорати остида бирга хизмат қилиши тақиқланади. Кадрлар бўйича қарорларнинг қонуний ва шаффоф бўлишини таъминлаш ҳамда манфаатлар тўқнашувининг олдини олишга алоҳида эътибор қаратилмоқда. Ўрганиш якунлангач, қонунда белгиланган тартибда чоралар кўрилади, дейилади бошқарма баёнотида.
Тошкент вилояти соғлиқни сақлаш бошқармасининг Комплаенс назорати хизмати ушбу тайинловни нима учун пайқамагани ҳозирча номаълумлигича қолмоқда.
Туманлараро перинатал маркази раҳбари лавозимига бошқа даъвогарлар ҳам ҳужжат топширган эди. Улардан бири Daryo’га ариза берган уч нафар шифокорга босим ўтказилганини айтди.
«Мен ARGOS платформаси орқали перинатал марказ раҳбарлигига ўз номзодимни қўйган эдим. шундан сўнг менга қўнғироқ қилиб, номзодимни қайтариб олишимни айтишди. Мен рад этдим. Кейинчалик платформа талаблари ўзгартирилиб, даъвогарлар илмий тадқиқот олиб борган ёки илмий даражага эга бўлиши кераклиги ҳақида шарт қўшилди. Оқибатда номзодларимиз танловдан автоматик равишда чиқиб кетди», деди номзод.