Конституциявий суд мажлислари интернетда трансляция қилинади
Конституциявий судга мажлисларни интернетда трансляция қилиш мажбурияти юкланди. Президент Шавкат Мирзиёев томонидан 14-октабр куни имзоланган Конституциявий суд тўғрисидаги қонуннинг янги таҳририга кўра, тегишли нормалар 2028-йил 1-январдан кучга киради.
Конституциявий суд мажлислари интернет орқали намойиш этилади
Конституциявий суд (КС) фуқаролар ва компанияларга онлайн мурожаат қилиш, шунингдек, жараёнда видеоалоқа ва мобил илова орқали қатнашиш имконини берадиган ахборот тизимини амалиётга жорий этади. Бундан ташқари, инстансияга мажлисларни интернетда трансляция қилиш мажбурияти юклатилди. Президент Шавкат Мирзиёев 14-октабр куни имзолаган КС тўғрисидаги қонуннинг янги таҳририга мувофиқ, тегишли нормалар 2028-йил 1-январдан кучга киради.
Демак, суд ишларини тўлиқ онлайн режимда юритишга имкон берадиган электрон тизимни яратиш ва ишга тушириш учун бир йилдан ортиқ вақт ажратилган. Қонунда белгиланган бошқа қоидалар эса у эълон қилинган заҳоти, яъни 14-октабрдан бошлаб амал қилади.
Эндиликда Конституциявий судда иш юритиш ёзма шакл билан бирга электрон шаклда ҳам олиб борилиши мумкин, бундай ҳужжатлар эса тенг юридик кучга эга бўлади.
Агар даъволар Конституциявий суд ваколатига кирмаса, КС мурожаатларни бошқа органларга юбориш ёки уларни кўриб чиқишни рад этиш ҳуқуқига эга. Жисмоний шахслар ва ташкилотлардан келиб тушган аризаларни дастлабки ўрганиш учун энг кўпи билан 15 кун ажратилади.
Янги таҳрирдаги қонунда ишларни кўриб чиқишга тайёрлаш тартиби — жараён иштирокчиларини аниқлашдан тортиб, мутахассис ва экспертларни жалб этишгача бўлган босқичлар — мустаҳкамлаб қўйилган. Тайёргарлик ишлари суд мурожаатни олган пайтдан бошлаб 20 кундан ошмаслиги керак. Шундан кейин инстансия 10 кун ичида муҳокамани тайинлаш ҳақида қарор қабул қилиши ва барча манфаатдор фуқароларни эшитув бошланишидан камида 5 кун олдин хабардор этиши шарт. Йиғилишнинг санаси, жойи ва вақти ҳақидаги маълумотлар КСнинг расмий веб-сайтида эълон қилиниши лозим.
Қонунда КС қарорларини тарафларга юборишнинг охирги муддати улар қабул қилинган вақтдан бошлаб 5 кун этиб белгиланган.
Агар иш Олий суднинг бошқа бирон-бир жараёнда қўлланилаётган норматив-ҳуқуқий ҳужжатнинг Конституцияга мувофиқлиги юзасидан тушунтириш беришни талаб қилувчи мурожаати асосида кўрилаётган бўлса, суд иш юритиши КС қарори чиққунга қадар вақтинча тўхтатиб турилади. Бундай ҳолатда қарор чиқариш учун бир ой муддат берилади.
Бундан ташқари, КС ҳар йили кўрсатилган даврда кўриб чиқилган ишлар амалиётидан келиб чиқиб, конституциявий қонунийлик ҳолати ҳақида ҳисобот тайёрлаш мажбуриятини олади. Маъруза республика президентига, шунингдек, мамлакат Олий Мажлисининг иккала палатасига юборилиши керак.