Конотоп, Запорижжя ва Киев дронлар ҳужумига учради
Россия қўшинларининг Украинага навбатдаги дрон ҳужуми оқибатида Суми вилоятининг Конотоп шаҳрида болалар боғчаси, мактаб, тиббиёт муассасалари, турар жойлар ҳамда транспорт ва энергетика инфратузилмаси зарарланди. Маҳаллий ҳокимият икки аёл жабрланганини маълум қилди. Запорижжяда эса зарба оқибатида савдо мажмуаси вайрон бўлган.
Конотоп, Запорижжя ва Киев дронлар ҳужумига учради
Россия қўшинлари 18-сентабрга ўтар кечаси Украинанинг бир қатор ҳудудларига учувчисиз учиш аппаратлари билан зарба берди, деб хабар бермоқда ДВ Украина расмий идоралари маълумотларига таянган ҳолда.
Суми вилоятидаги Конотоп шаҳрига берилган ҳужумлар натижасида болалар боғчаси, мактаб ва тиббиёт муассасаси зарар кўрган. Бундан ташқари, хусусий уйлар, газ тақсимлаш тармоғи, кичик бизнес корхоналари, электр узатиш линиялари ҳамда темир йўл инфратузилмаси шикастланган.
Конотоп мери Артём Семенихин айтишича, ҳужум оқибатида икки аёл жароҳат олган. Газ тақсимлаш тармоғига етган зарар сабаб шаҳарнинг бир қисми газсиз қолган.
17-сентабр куни кечқурун Россия қўшинлари Запорижжядаги савдо мажмуасига ҳам зарба берган, дея хабар берди маҳаллий ҳокимият.
Украина Фавқулодда вазиятлар давлат хизмати маълумотига кўра, зарбадан сўнг катта ёнғин келиб чиққан ва савдо мажмуаси вайрон бўлган. Бир киши жароҳатланган.
Қутқарувчилар 10 минг квадрат метрдан ортиқ майдонни қамраб олган ёнғинни ўчирган. Украина қутқарув хизматига кўра, такрорий зарбалар хавфи туфайли ўт ўчирувчилар ишни бир неча бор тўхтатиб, бошпаналарга чекинишга мажбур бўлган. Кейинроқ авария-қутқарув ишлари тугалланган.
Украина пойтахти Киев ҳам кечқурун дронлар ҳужумига учраган. Шаҳар мери Виталий Кличко маълумотига кўра, Подол туманида учувчисиз аппарат нотурар бинога урилган.
Ҳужум оқибатида бир эркак жароҳат олиб, шифохонага ётқизилган.
Украина Ҳарбий-ҳаво кучлари маълумотига кўра, Россия тунги ҳужум чоғида Украинага жами 93 та учувчисиз учиш аппаратини учирган.
Украина томони улар орасида Шаҳед туридаги зарба берувчи дронлар, реактив учувчисиз аппаратлар, «Гербера» ва «Пародия» каби нишонни чалғитувчи аппаратлар, шунингдек, «Бандерол» ва «Дан-Т» туридаги воситалар бўлганини билдирган.