Конор ёки Гетжи: Ҳабибнинг фаолиятидаги энг оғир жанг қайси?

Конор Макгрегор ва Жастин Гетжи билан бўлган жангларни солиштирар экан, УФС енгил вазн тоифасининг собиқ чемпиони Ҳабиб Нурмагомедов Гетжига қарши кечган баҳсни ўз фаолиятидаги энг қийин жанг деб атади.

Ҳабибнинг сўзларига кўра, Конорга қарши жанг ўша пайтда унинг фаолиятидаги энг оғир жанг бўлган. "100 фоиз. Жанглар бу психология. Руҳий жиҳатдан ўша пайтда бу энг оғир жанг эди. Шундан кейин Гетжи билан бундан ҳам оғирроқ жангим бўлди", — дейди у.

Нурмагомедов Гетжига қарши баҳс нима учун энг оғир бўлганини қуйидагича изоҳлади: "Аввало, отамдан айрилганим сабабли. Ўзимни қўлга олиш жуда қийин бўлди. Ҳаммаси бир-бирига қўшилиб кетди. Отам вафот этди, тайёргарликни усиз ўтказдим — мен шуғулланган ва чемпион бўлишни истаган инсонсиз. Энг аввало, унга энг яхши бўлишим мумкинлигини исботламоқчи эдим".

"Бургут" лақабли спортчи сўнгги жанг олдидан соғлиғи билан боғлиқ муаммоларга дуч келганини ҳам таъкидлади. "Йиғин давомида ҳам соғлиғим яхши эмасди, бирин-кетин жароҳатлар олдим. Руҳий жиҳатдан эса ўткирлигимни сақлаб қолгандим. Ҳали ҳеч ким бу менинг сўнгги жангим эканини билмасди. Мен эса ўзим учун билардим: у ерда ҳаммасига нуқта қўйишим керак эди. Буларнинг барчасидан ўтиш, жароҳат олиш жуда оғир бўларди. Онам яна буни бошидан кечириши керак эди. Фаолиятимни якунлаш ҳақида у билан гаплашган эдик. Шу сабабли ҳаммасига нуқта қўймоқчи эдим", — дейди Нурмагомедов.

Маълумот учун, Ҳабиб Нурмагомедов 2021-йилда УФСъдаги сўнгги жангида америкалик Жастин Гетжини бўғиш усули орқали мағлуб этган. У ММАъдаги фаолияти давомида 29 та жанг ўтказиб, уларнинг барчасида ғалаба қозонган. 2022-йилда эса у УФС Шон-шараф залига киритилган.

Нурмагомедов отасининг вафотидан сўнг мураббийлик фаолияти билан шуғуллана бошлади. У Хавьер Мендес билан бирга Ислом Махачев, Умар ва Усмон Нурмагомедовларга мураббийлик қилиб келмоқда. Шунингдек, Нурмагомедов Кҳабиб Гйм халқаро спорт заллари тармоғини ривожлантирган ва турли спорт лойиҳаларига сармоя киритган.