Конго ДРда эбола ҳақида радиода чиқиш қилган ҳукмрон партия вакили калтаклаб ўлдирилди

Конго ДРда эбола ҳақида радиода чиқиш қилган ҳукмрон партия вакили калтаклаб ўлдирилди

Конго Демократик Республикаси (КДР) ҳукмрон партиясининг юқори мартабали аъзоси 27-сентабр куни эбола эпидемияси ҳақида хабардорликни оширишга бағишланган радиодастурда қатнашганидан кейин калтаклаб ўлдирилди.

Касалликнинг янги ўчоғига айланган Бутембо шаҳрида “Демократия ва ижтимоий тараққиёт учун иттифоқ” (УДПС) партияси федерал ижроия қўмитаси президенти вазифасини бажарувчи Мари-Селестен Карондва касалликнинг олдини олиш чораларини тарғиб қилган радиодастурда иштирок этган.

Партия маълумотига кўра, ҳужумчилар Карондвани калтаклаган, унинг буюмларини ўғирлаб кетган ва уйига ўт қўйган. У олган тан жароҳатлари сабаб вафот этган.

Ҳужумни кимлар уюштиргани, унда нечта одам қатнашгани ва бунга айнан нима туртки бўлгани номаълумлигича қолмоқда. Бироқ партия Карондвани “партиянинг эбола вируси касаллиги мавжудлиги… ва унинг аҳолига солаётган хавфи борасидаги позициясини ҳимоя қилгани учун бегуноҳ қурбон бўлди” деб таъкидлади.

Карондванинг ўлими тиббиёт ходимлари ва даволаш марказларига қилинган бир қатор ҳужумлар фонида юз берди. Мутахассислар бу ҳужумлар касаллик ҳақидаги миш-мишлар ва ёлғон ахборотлар, шунингдек тиббиёт ходимларига нисбатан ишончсизлик сабаб кучайиб бораётганини айтади.

Илк бор 1976-йилда ҳозирги КДР ҳудудида аниқланган эбола — одамлар ва приматларда учрайдиган, жуда юқумли ва кўпинча ўлим билан якунланадиган вирусли касаллик. У тана суюқликлари ёки зарарланган буюмлар орқали тарқалади ҳамда аъзоларнинг шикастланишига, қон томирлари фаолиятининг бузилишига ва баъзан оғир ички ҳамда ташқи қон кетишларга олиб келади.

Ҳозирги эпидемияни тасдиқланган давоси ёки ваксинаси бўлмаган камёб Бундибугё вируси келтириб чиқармоқда. У ҳақида илк бор 15-май куни хабар берилган бўлиб, КДР Соғлиқни сақлаш вазирлиги маълумотларига кўра, касаллик 8067 кишига юққан ва 3901 кишининг умрига зомин бўлган.