Колумбиянинг янги президенти қурол назорати қоидаларини юмшатди
Президент Абелардо де ла Эсприэлья қонуний ўқотар қурол олиб юришга рухсатномалар бериш бўйича ўн йиллик тақиқни бекор қилди.
Колумбиянинг янги президенти қурол назорати қоидаларини юмшатди
Абелардо де ла Эсприэлья июнь ойида бўлиб ўтган президентлик сайловларида жиноятчиликка қарши қаттиққўл бўлиш ваъдаси билан ғалаба қозонган эди
Колумбия Президенти Абелардо де ла Эсприэлья жамоат жойларида қонуний ўқотар қурол олиб юриш чекловларини юмшатувчи декретни имзолади.
Президентлик кампанияси даврида жиноятчиликка қарши темир мушт билан курашишга ваъда берган Де ла Эсприэлья «жиноятчилар тиш-тирноғигача қуролланган, оддий одамлар эса ўзларини ҳимоя қила олмайдиган вазият тўғри эмаслигини» айтди.
Ушбу декрет ўн йил давомида амалда бўлган тақиқни бекор қилади. Унга кўра, ҳатто қурол олиб юриш ҳуқуқини берувчи рухсатномага эга бўлган шахслар ҳам қўшимча рухсатсиз қурол олиб юра олмас эдилар.
Де ла Эсприэльянинг таъкидлашича, декрет ҳамма учун пала-партиш қуролланишга йўл очмайди ва қуролга эгалик қилиш ҳуқуқи кимга берилиши устидан қатъий назорат ўз кучида қолади.
Декретни имзолар экан, президент сайловолди ваъдасини бажарганини айтди: «Эркак кишининг сўзи — унинг шарафи, менда эса шараф бор, шунинг учун ваъдамнинг устидан чиқаман».
Жамоат жойларида қонуний қурол олиб юришни тақиқлаш ўша пайтдаги президент Хуан Мануэль Сантос томонидан 2015 йил декабрида жорий этилган эди. Бу дастлаб Рождество ва Янги йил байрамлари даврида хавфсизликни яхшилаш учун вақтинчалик чора сифатида режалаштирилган эди.
Бироқ, Сантос ва ундан кейинги сиёсий спектрнинг қарама-қарши қутбларида турган икки президент — консерватор Иван Дуке ва сўл қанот вакили Густаво Петро ушбу тақиқ муддатини ҳар йили узайтириб келишди.
Қонунга кўра, ҳатто рухсатномаси бор шахслар ҳам қўшимча рухсат сўраб мурожаат қилмагунча ва уни олмагунча қуролни уйларидан ташқарига олиб чиқа олмас эдилар.
Де ла Эсприэльянинг айтишича, унинг декрети ҳеч қачон доимий бўлиши кўзда тутилмаган чекловни бекор қилди.
Испаниянинг El País газетаси хабар беришича, ушбу декрет Колумбияда қурол олиб юриш учун қонуний рухсатномага эга бўлган деярли 700 000 кишига дахлдор бўлади.
Эндиликда уларга, агар рухсатномаларининг амал қилиш муддати тугамаган бўлса, рўйхатдан ўтган қуролларини уйдан ташқарига олиб чиқишга рухсат берилади.
«Яшил альянс» партияси сенатори Ариэль Авила бу қадамни «жиддий хато» деб атади ва қонуний сақланаётган қуроллар жиноятчилар қўлига тушиб қолишини айтди.
Авиланинг таъкидлашича, бу ахлоқий муаммони келтириб чиқаради, чунки фақат давлат кучлари қурол олиб юриши ва одамлар хавфсизлигининг кафили бўлиши керак.
Де ла Эсприэлья бу чора мамлакатдаги хавфсизликка зарар етказмаслигини айтди ва ҳуқуқ-тартибот идоралари ноқонуний қурол олиб юрган шахсларни таъқиб қилаётганини ҳамда шу йилнинг ўзида 15 000 дан ортиқ ўқотар қурол мусодара қилинганини қўшимча қилди.
Де ла Эсприэльянинг сўзларига кўра, уларнинг аксарияти Farc исёнчилар гуруҳининг ажралиб чиққан фракциялари ва «Кўрфаз клани» жиноий тўдаси аъзоларига тегишли бўлган.