Колумбия Исроилнинг Голан тепаликларига бўлган даъвосини тан олди
Колумбиянинг янги ўнг қанот ҳукумати 10-август куни Исроилнинг Голан тепаликларига бўлган даъвосини тан олди. Исроил бу ҳудудни 1967-йилда Суриядан тортиб олган эди. Бу ҳақда Ал Арабия хабар берди.
Шу пайтгача фақатгина АҚШ Исроилнинг 1981-йилда бу ҳудудни аннексия қилганини тан олган ягона давлат эди. Колумбиянинг янги президенти Абелардо де ла Эсприелла 7-август куни ҳокимият тепасига келди. У сайлов кампанияси давомида мамлакатидаги қуролли гуруҳларга қарши курашиш учун Қўшма Штатлар ва Исроил билан яқин алоқалар ўрнатишга ваъда берган эди.
Мамлакат Ташқи ишлар вазирлиги бу қарорни Колумбия ғарбида камида 111 кишининг умрига зомин бўлган ва ўнлаб кишиларни жароҳатлаган 7,4 магнитудали зилзила юз берган куни эълон қилди.
Х тармоғида эълон қилинган баёнотда шундай дейилади: “Колумбия ҳукумати Исроилнинг ушбу ҳудуд устидан суверенитетини, шунингдек, ушбу давлатнинг ташқи таҳдидлардан ўзини ҳимоя қилиш ҳуқуқини тан олади”.
Қўшимча қилинишича, “Колумбия Исроилнинг Голан тепаликлари устидан назорати ва суверенитетини сақлаб қолиши унинг миллий мудофаасининг муҳим таркибий қисми эканини эътироф этади”.
Бирлашган Миллатлар Ташкилоти ушбу тоғли ҳудудни Исроил ҳарбий оккупацияси остидаги Сурия ҳудуди деб ҳисоблайди. Исроил Ташқи ишлар вазири Гидеон Саар бу тан олиш учун ўзининг “қадрдон дўсти” Де ла Эсприеллага миннатдорчилик билдирди.
Унинг сўзларига кўра, иккала томон Де ла Эсприелланинг инаугурация маросимидан бир кун олдин Колумбиянинг Барранкиля шаҳрида ушбу қарор бўйича келишиб олган.
Қасамёд маросимида қатнашган Саар Х тармоғида шундай ёзди: “Ҳимояланган чегаралар яҳудий халқининг тарихий ватанида мавжудлигини таъминлаш учун жуда муҳимдир”.
Июл ойида БМТ Бош котиби Антониу Гутерриш Голан тепаликлари Суриянинг бир қисми эканини яна бир бор таъкидлаб, Исроил оккупациясини “мутлақо қабул қилиб бўлмайдиган ҳолат” деб баҳолаганди.
Де ла Эсприелладан олдинги сўлчи президент Густаво Петро Исроилнинг Ғазо секторидаги ҳужумларини кескин танқид қилган ҳамда дипломатик муносабатларни узиб, Колумбияга Исроил қуроллари импортини тўхтатган эди. Ҳозир ҳокимиятда бўлган, АҚШ томонидан қўллаб-қувватланадиган миллиардер эса алоқаларни тиклашга ваъда берган.
Июл ойида у Қуддусда Колумбия элчихонасини очишни режалаштираётганини айтди. Исроил Қуддусни, жумладан унинг босиб олинган Фаластин қисмини ҳам ўз пойтахти деб ҳисоблайди. Бироқ бу халқаро миқёсда тан олинмаган ва кўпчилик мамлакатлар ўз дипломатик ваколатхоналарини Тел-Авивда юргизади.