Колумбия ғарбидаги бомба ҳужумида ҳалок бўлган тўрт киши орасида чақалоқ ҳам бор, дейди расмийлар
Ҳарбий базани нишонга олгандек кўринган ушбу ҳужум ортида ким тургани ҳозирча аниқ эмас.
Колумбия ғарбидаги портлашда ҳалок бўлган тўрт киши орасида чақалоқ ҳам бор, дейди расмий шахс
Портлаш оқибатида бир нечта бино, жумладан, дорихона ва шифохона зарар кўрди
Якшанба куни Колумбия ғарбидаги Толима провинциясида портловчи моддалар ортилган юк машинаси портлаб кетиши оқибатида камида тўрт киши ҳалок бўлди, хабар берди маҳаллий расмий шахс.
Толима губернатори Адриана Магали Матиз X платформасидаги постида ёзишича, ҳалок бўлганлар орасида икки ойлик чақалоқ қиз ҳам бор.
Юк машинаси Планадас шаҳридаги ҳарбий база яқинида портлаб, яқин орадаги шифохона ва бошқа бир нечта биноларга зарар етказган.
Портлашни ким амалга оширгани ҳозирча номаълум, аммо қуролланган жиноий гуруҳлар сўнгги пайтларда хавфсизлик кучларига ҳужумларни кучайтирди. Бу янги ўнг қанот президенти Абелардо де ла Эсприелья томонидан уларга қарши буюрилган ҳужумга жавоб чораси бўлиши мумкин.
Де ла Эсприелья жиноятчиликка қарши кураш шиори билан ўтказилган кампаниядан сўнг август ойида лавозимга киришган эди.
Бир ойдан кам вақт ичида у Колумбиядаги баъзи ноқонуний қуролли гуруҳлар билан тинчлик музокараларини тўхтатди. Бу музокаралар унинг сўл қанотдаги ўтмишдоши Густаво Петро даврида бошланган эди.
«Менинг ҳукуматимда жиноятчилар ҳеч қандай сиёсий мақомга, юмшоқликка ва жазосизликка эга бўлмайди», деб ёзган эди Де ла Эсприелья ўшанда ижтимоий тармоқдаги постида.
Президентлигининг бошида Петро Колумбиянинг кўплаб қуролли гуруҳлари томонидан содир этилаётган зўравонликларга фақат музокаралар орқали чек қўйиш мумкинлигини айтиб, «тотал тинчлик стратегияси»ни илгари сурган эди.
Аммо музокаралар шартлари қайта-қайта бузилганидан сўнг, Петро тинчлик музокараларининг баъзиларини тўхтатди.
Де ла Эсприелья бундан ҳам илгарилаб, мамлакатдаги сиқувга олиш ҳаракатларини барча ноқонуний гуруҳларга ёйди, жумладан, уларнинг лагерларини бомбардимон қилди.
Бунга жавобан ушбу гуруҳлар хавфсизлик кучларига ҳужумларини кучайтирдилар.
Шанба куни жанубий Уила провинциясида портловчи моддалар жойлаштирилган мотоцикл портлатилиши оқибатида бир полиция ходими ҳалок бўлди, яна олти киши жароҳатланди.
Президент Де ла Эсприелья буни «қўрқоқларча террорчилик ҳужуми» деб атади.
Шунингдек, ноқонуний гуруҳлар портловчи моддаларни ташиш учун автомобиллар ёки мотоцикллар ўрнига дронлардан фойдаланган бир нечта ҳодисалар юз берди.
Шундай ҳужумлардан бирида, 23 октябрь куни Каука провинциясида Ҳарбий-деңиз кучлари кемаси бортида бир денгиз пиёдаси ҳалок бўлди ва тўрт киши жароҳатланди.