Когонда гиёҳванд моддалар сабаб икки шахсга ҳукм ўқилди
Қайд этилишича, Когон шаҳрида тезкор тадбир ўтказилган. Унда назорат остидаги харид учун 5 миллион сўм
Когонда гиёҳванд моддалар билан боғлиқ жиноят иши бўйича икки шахсга ҳукм ўқилди. Бу ҳақда Бухоро вилояти суди ахборот хизмати раҳбари Феруз Шаропов «Xabar.uz»га маълум қилди. Судланган шахслар илгари судланмаган.
Жиноят ишлари бўйича Когон шаҳар суди 31 ёшли Суннат Ярашев ва 21 ёшли Вали Самиевга нисбатан жиноят ишини кўриб чиқди.
Когон шаҳрида ўтказилган тезкор тадбирда назорат остидаги харид учун 5 миллион сўм пул берилган. Ярашев ва Самиев олдиндан тил бириктириб, ушбу пул эвазига 14,40 грамм «гашиш» гиёҳвандлик воситасини сотишга уринган.
Самиевнинг суддаги кўрсатмасига кўра, у Ярашевдан олган 5 миллион сўм қарзи эвазига гиёҳвандлик воситасини гаров сифатида қолдирган. Кейинчалик қарзининг бир қисмини қайтариб, моддани олиб кетган. Назорат остидаги харид жараёнида у «Амир» тахаллусли шахсдан 5 миллион сўм олиб, яна Ярашевнинг уйига борган.
Ярашев эса ўз айбига иқрор бўлмаган. У Самиевдан қарз олгани, гиёҳвандлик воситасини гаровга қолдиргани ва кейинчалик қарзини қайтариб, уни олиб кетганини айтган. Суд бу важларни жавобгарликдан қочиш мақсадида билдирилган деб баҳолаган.
Судда сўроқ қилинган гувоҳлар ва иш ҳужжатларига кўра, Самиевдан гиёҳвандлик воситасига ўхшаш модда ҳамда назорат тадбирида ишлатилган пулларнинг бир қисми олинган. Шундан сўнг ҳуқуқни муҳофаза қилувчи органлар Ярашевнинг Бухоро шаҳридаги яшаш манзилини кўздан кечирган.
Кўздан кечириш жараёнида уйдан гиёҳвандлик воситасига ўхшаш моддалар, 4,3 миллион сўм пул, махсус идишлар ва тўрт дона гултувак топилган. Экспертиза хулосаларига кўра, олинган моддалар «гашиш» бўлиб, уларнинг миқдорлари аниқланган.
Когон шаҳар суди раиси Акрам Раҳимовнинг сўзларига кўра, суд Ярашевга қўйилган Жиноят кодексининг тегишли моддалари бўйича айбловни исботланмаган деб топган. Терговда гултуваклардаги ўсимликлар тақиқланган каннабис экани ҳақида экспертиза ўтказилмагани ва ўсимлик тури аниқланмагани суд томонидан инобатга олинган. Суд Конституция ва Жиноят-процессуал талабларига таяниб, айбдорликка оид барча шубҳалар судланувчи фойдасига ҳал қилиниши лозимлигини инобатга олган. Шу асосда Ярашев мазкур ҳолат бўйича айбсиз деб топилган ва ишнинг шу қисми тугатилган.
Бироқ, суд Ярашевни гиёҳвандлик воситасини ўтказиш мақсадида сақлаш билан боғлиқ жиноятларда айбдор деб топган. Унга 6 йил озодликдан маҳрум қилиш жазоси тайинланган. Жазоларни қисман қўшиш орқали унга узил-кесил 8 йил озодликдан маҳрум қилиш жазоси белгиланган.
Самиевга эса унинг ёши ва айбига тўлиқ иқрорлиги инобатга олиниб, 6 йил озодликдан маҳрум қилиш жазоси белгиланган.
Ҳар икки судланувчи жазони умумий тартибли колонияда ўтайдиган бўлди.