Кўчада ручка сотган йигитдан Болливуд афсонасигача: Жонни Левернинг кулги ортидаги ҳаёти

Кўчада ручка сотган йигитдан Болливуд афсонасигача: Жонни Левернинг кулги ортидаги ҳаёти

Ҳинд киносида шундай актёрлар бор-ки, улар бош ролни ўйнамаса ҳам, филмнинг энг ёдда қоладиган қаҳрамонига айланиши мумкин. Жонни Левер ана шундай санъаткорлардан бири. Унинг мимикаси, тақлид қилишдаги маҳорати ва ўзига хос ҳазиллари 1990-йиллар бошида улғайган томошабинлар хотирасида муҳрланиб қолган.

Бироқ экранда одамларни кулдирган бу актёрнинг ўзи ҳам бу даражага осон етиб келмаган. У мактабни 7-синфдан кейин ташлаган, Мумбай кўчаларида ручка сотган ва одамларни тақлид қилиб кулдирган. Кейинчалик эса Ҳиндистоннинг энг машҳур комик актёрларидан бирига айланган.

Жонни Левернинг асл исми — Жон Пракаш Рао Жанумала. У 1957-йил 14-августда Ҳиндистоннинг Андҳра-Прадеш штатида туғилган. Кейинроқ оиласи Мумбайга кўчиб ўтади ва бўлажак актёр шаҳарнинг Кинғс Сирсле ҳамда Дҳарави ҳудудларида улғаяди.

Оиладаги молиявий қийинчиликлар сабаб у Андҳра Телугу мактабида фақат 7-синфгача ўқийди. Сўнг турли ишларда ишлаб, оиласига ёрдам бера бошлайди. Бир муддат Мумбай кўчаларида ручка сотгани ҳам унинг ҳаётидаги муҳим босқичлардан бири бўлган.

Аммо Жонни бошқалардан бир жиҳати билан ажралиб турарди: у тақлид қилишни жуда яхши кўрарди. Кўчада ручка сотаётган пайтида ҳам Болливуд юлдузларига тақлид қилиб, қўшиқ куйлаб, одамларни кулдирарди. Шу тариқа унинг ноодатий истеъдоди аста-секин даромад манбаига айлана бошлайди.

Қизиғи, унинг машҳур тахаллуси ҳам оддий тасодиф эмас.

Жонни бир муддат Ҳиндустан Левер компаниясида ишлаган. Ишхонадаги тадбирларда ҳамкасбларини тақлид қилиб, турли чиқишлар қиларди. Унинг комик чиқишлари шу қадар машҳур бўлиб кетадики, одамлар уни “Жонни Левер” деб атай бошлайди. Кейинчалик бу ном унинг доимий саҳна тахаллусига айланади.

1980-йилларнинг бошида саҳнадаги чиқишлари кўпайиб, у компаниядаги ишидан кетади. Шундан сўнг Жонни Левер профессионал комик сифатида фаолиятини давом эттира бошлайди. У турли консертларда, жумладан мусиқий шоулар ва гастролларда қатнашиб, аста-секин катта аудиторияга танила бошлайди.

Жонни Левер ҳаётидаги катта бурилишлардан бири актёр Сунил Датт билан боғлиқ. Унинг саҳнадаги чиқишларидан бирини кўрган Сунил Датт ёш комикнинг истеъдодига эътибор қаратади. Кейинчалик Левер кино оламига кириб келади. 1980-йиллар ўрталарида эса “Ҳопе 86” хайрия тадбиридаги чиқиши унинг учун яна бир муҳим қадам бўлади. У ерда бутун ҳинд кино саноати вакиллари олдида саҳнага чиқиб, томошабинларни кулдиради. Шундан сўнг продюсер Гул Ананд унга “Жалва” филмида рол беради.

Аммо Жонни Левернинг ҳақиқий машҳурлиги 1990-йилларда бошланади.

Жонни Левер кўпинча бош қаҳрамоннинг дўсти, ёрдамчиси ёки кулгили вазиятларга сабаб бўладиган иккинчи даражали персонажларни ижро этган. Лекин унинг экрандаги иштироки кўпинча филмнинг энг ёрқин қисмларидан бирига айланган.

Умуман олганда, у 300 дан ортиқ ҳинд филмларида суратга тушган.

Унинг актёрлик услуби ҳам бошқалардан кескин фарқ қиларди. Жонни Левер шунчаки матнни айтиб берадиган комик эмас эди. Юз ифодаси, овоз, тана ҳаракати ва турли персонажларга тақлид қилиш унинг асосий қуроллари бўлган. Шу сабабли кўпинча бир неча сониялик саҳнанинг ўзи ҳам томошабин ёдида қоларди.

Жонни Левернинг комедия жанридаги меҳнати кино саноатининг энг нуфузли мукофотларидан бири — Филмфаре томонидан ҳам эътироф этилган.

У “Энг яхши комик актёр” номинациясида жами 13 марта номзод бўлган. Актёр икки марта — “Девона-ю Мастона” ва “Куёв Ража” филмларидаги роллари учун Филмфаре мукофотини қўлга киритган.

Унинг фаолияти фақат кино билан чекланиб қолмаган. Жонни Левер минглаб жонли чиқишларда қатнашган. 1999-йилги Филмфаре маросимида эса Майкл Жексонга тақлид қилгани унинг энг эсда қоларли саҳна чиқишларидан бири бўлган.

Жонни Левер 1984-йилда Сужатҳа Леверга уйланган. Уларнинг икки фарзанди — қизи Жамие ва ўғли Жессе бор.

Айниқса қизи Жамие Левер отасининг изидан бориб, комедия ва актёрлик соҳасини танлаган. У замонавий ҳинд комедия саҳнасида ўз номини яратишга ҳаракат қилмоқда.

Жамиенинг сўзларига кўра, Жонни Левер уйда жиддий, тартибли инсон бўлиб, ҳатто кунлик 10 минг қадам юришни ҳам канда қилмайди. Жамие, шунингдек, отаси 1990-йилларда иш билан жуда банд бўлганини, кейинчалик эса оиласига кўпроқ вақт ажратиш учун филмлар сонини камайтирганини таъкидлаган.

Жонни Левернинг ҳикояси фақат Болливуддаги муваффақият ҳақида эмас. Унинг фаолияти Ҳиндистон киносида комик актёрларнинг имкониятлари қанчалик кенгайганини ҳам кўрсатади.

У бош ролни ижро этмаган филмларда ҳам бир неча дақиқалик саҳналари билан томошабинни кулдира олган. Энг муҳими, у комедияни шунчаки иккинчи даражали унсур эмас, балки актёрнинг мустақил кучи сифатида намоён қилган.