Киевдаги болалар шифохонасига зарба беришда айбланган россиялик генерал отиб кетилди
Киевдаги болалар шифохонасига зарба беришда айбланган россиялик генерал отиб кетилди
Россиянинг Саратов вилоятида Киевдаги “Охматдет” болалар шифохонасига ракета зарбасини ташкил этишда айбланган генерал-маёр Николай Варпахович отиб кетилди.
Воқеа 3-сентябр куни эрталаб Энгелс туманидаги Пробуждение қишлоғида юз берган. Номаълум шахс мотосиклда келиб, дўкондан чиқаётган Варпаховичга яқин масофадан икки марта ўқ узган ва кейин воқеа жойидан қочган. Ўқлардан бири унинг юзига, иккинчиси танасига теккан.
Генерал оғир аҳволда шифохонага ётқизилган, кейинроқ эса даволаниш учун Москвага олиб кетилган. Россия расмийлари яраланган ҳарбийнинг шахсини ҳозирча ошкор қилмаган.
Шунга қарамай, ҳарбий Телеграм каналлари уни Россия узоқ масофали авиацияси таркибидаги 22-оғир бомбардимончи авиация дивизияси қўмондони Николай Варпахович деб атаган. АСТРА маълумотига кўра, Пробуждение қишлоғи Варпаховичнинг рўйхатдан ўтган манзилларидан бири ҳисобланади.
Энгелс шаҳри Москвадан қарийб 850 километр узоқликда жойлашган. Бу ерда Россиянинг асосий стратегик авиация обьектларидан бири — Энгелс-2 авиабазаси мавжуд.
Украина хавфсизлик хизмати Варпаховичга 2024-йил 8-июлда Киевдаги “Охматдет” болалар шифохонасига ракета зарбаси бериш билан боғлиқ иш бўйича сиртдан айблов қўйган. Украина терговига кўра, у ҳужумга буйруқ берган, зарбада Х-101 қанотли ракетаси ишлатилган.
Ҳужум оқибатида икки киши ҳалок бўлган, 30 дан ортиқ одам, жумладан, тўққиз нафар бола жароҳатланган. Украина Соғлиқни сақлаш вазирлиги маълумотига кўра, зарба пайтида шифохонада 627 нафар бола даволанаётган эди.
Украина хавфсизлик хизмати 31-август куни Варпахович билан бирга яна бир россиялик ҳарбий — 49-қўшма қўшин армияси ракета бригадаси қўмондони полковник Александр Лутовиновга қарши ҳам далиллар тўпланганини маълум қилган. Украина томони уни 2024-йил 24-августда Краматорскдаги Саппҳире меҳмонхонасига ракета зарбасини ташкил этишда айблайди. Ўша ҳужумда Реутерс хавфсизлик бўйича маслаҳатчиси ҳалок бўлган, беш нафар журналист жароҳатланган.