Киев кундузги зарбалардан кейин тунда яна ҳужумга учради
Россия қўшинлари 29-сентабрга ўтар кечаси Киевга баллистик ракеталар ва учувчисиз учиш аппаратлари билан яна ҳужум қилди. Шаҳар расмийларига кўра, ракета парчалари турар жой ҳовлисига тушган, бир неча бинода ёнғин чиққан. Тунги ҳужум оқибатида ҳалок бўлганлар ёки жабрланганлар ҳақида ҳозирча маълумот берилмаган.
Киев кундузги зарбалардан сўнг тунда яна ҳужумга учради
ДВ хабарига кўра, Киев мери Виталий Кличко Соломенский туманида ракета парчалари уй ҳовлисига тушганини маълум қилган. Унинг дастлабки хабарида бу жойда ёнғин бўлмагани айтилган.
Кличко Печерский туманидаги уч қаватли нотурар бинода ҳам ёнғин чиққанини билдирган. Кейинроқ у Соломенский туманида зарбадан сўнг таълим муассасаси корпусларидан бирида ёнғин юз берганини маълум қилган.
Киев шаҳар ҳарбий маъмурияти эса учувчисиз учиш аппарати йўлнинг қатнов қисмига қулаганини хабар қилган. Шунингдек, Голосеевский туманида парчалар беш қаватли уй томига тушиши оқибатида ёнғин чиққан.
28-сентабрдаги ҳужумларда икки киши ҳалок бўлган
Тунги зарбалар Киев марказига кундузи уюштирилган ҳужумларнинг давоми бўлди. Кличконинг маълум қилишича, 28-сентабр куни бошидан шаҳарга берилган зарбалар оқибатида икки киши ҳалок бўлган, яна 26 киши жароҳатланган.
Жабрланганларнинг саккиз нафари шифохонага ётқизилган. Улардан бирининг аҳволи оғир деб баҳоланган.
Ҳалок бўлган икки киши ҳам Украина Миллий фанлар академияси биносига дрон зарбаси қурбони бўлган. Ҳужум оқибатида кучли ёнғин чиқиб, одамлар бинода қамалиб қолган. Кўпчилик деразалар орқали ташқарига чиқишга мажбур бўлган.
Россиянинг яна бир зарбаси «Добробут» тиббиёт маркази биносига тўғри келган.