“Киселёв устида қора булутлар”. Кремл “Россия 1” телеканалининг таниқли тарғиботчисини ишдан олмоқчи
“Киселёв устида қора булутлар”. Кремл “Россия 1” телеканалининг таниқли тарғиботчисини ишдан олмоқчи
Россия президенти администрацияси “Россия 1” телеканалида 2012-йилдан буён “Вести недели” (Ҳафта хабарлари) дастурини олиб бораётган машҳур бошловчи Дмитрий Киселёвни эфирдан четлатиш ниятида. Бу ҳақда сиёсий доиралар ва ҳуқуқ-тартибот органлари фаолиятини ёритувчи “ВЧК-ОГПУ” Телеграм канали ўз манбаларига таяниб хабар берди.
Кузатувчилар Киселёвни федерал телеканал эфири орқали тажовузкор риторикани илгари суришда ва янгиликларни журналист этикасидан четга чиққан ҳолда драматизм билан тақдим этишда айблашади. Маълум қилинишича, янги телевизион мавсумдан бошлаб унинг ўрнини вақтинча Россия Давлат Думасининг собиқ депутати Евгений Попов эгаллаши мумкин.
Канал суҳбатдошларининг таъкидлашича, Кремл Киселёвдан тобора норози бўлиб, унга нисбатан бир қатор эътирозлар тўпланган. Булар орасида “Вести недели” дастурига томошабинлар қизиқишининг пасайиши, бошловчининг зиддиятли характери, бошқа фикрларга тоқацизлиги ҳамда президент администрацияси амалдорларининг тавсияларига қулоқ солишни истамаслиги бор.
Манбалар Киселёв нафақат эфирдан четлатилиши, балки 2013-йилда ташкил этилган “Россия сегодня” ахборот агентлиги бош директори лавозимидан ҳам озод этилиши мумкинлигини айтмоқда. Уларнинг сўзларига кўра, тарғиботчи кейинчалик “фахрий нафақахўр” сифатида рамзий лавозимга тайинланиши мумкин.
“ВЧК-ОГПУ” манбасининг айтишича, 72 ёшли бошловчи ўзи ҳақида тайёрланаётган қарордан хабардор бўлиб, бу уни қаттиқ таъсирлантирган.
“У ъВсероссияъ давлат телерадиокомпанияси (ВГТРК)нинг Ямское поле кўчасидаги бош қароргоҳида қора булутдек қорайиб юрибди. Киселёв ўзининг интригалар ва чақимчиликлар қурбони бўлганига ишонмоқда”, деган канал суҳбатдоши.
Дмитрий Киселёв Россия тарғиботчилари орасида энг таниқли шахслардан бири ҳисобланади. Владимир Путин уни 2013-йилда ташкил этилган “Россия сегодня” ахборот агентлигига бош директор этиб шахсан тайинлаган.
Киселёв Қрим аннексия қилинган вақтда ўзининг кескин баёноти билан кенг танилган. Ўшанда у Россия ихтиёрида “АҚШни радиоактив кулга айлантиришга қодир” қуроллар борлигини айтганди. Шундан сўнг тарғиботчи Қўшма Штатлар ва Европа давлатларининг санксияларига тушган.