Киану Ривз 62 ёшда: қизи ва рафиқасидан айрилган ливанлик актёрнинг фожиали ҳаёти ҳақида

Киану Ривз 62 ёшда: қизи ва рафиқасидан айрилган ливанлик актёрнинг фожиали ҳаёти ҳақида

“Голливуддаги энг қайғули йигит” ва “Энг машҳур саргардон” деган номларга сазовор бўлган Киану Ривз ҳаётидаги кетма-кет кўнгилсизликлар сабаб кулишни деярли унутганди. Бироқ йиллар ўтиб, уни яна табассум қилишга ўргатган инсон ҳақидаги қизиқарли ҳикояни эътиборингизга ҳавола этамиз.

“Тоғ чўққиларидан совуқ шамол”

Киану 1964-йил 2-сентябрда Ливанда туғилган. Гавайи тилидан таржима қилинганда “тоғ чўққиларининг совуқ шамоли” деган маънони англатувчи Киану исмини унга отаси берган. Афсуски, бу унинг ўғлига қолдирган ягона мероси эди. Киану уч ёшга кирганида ота-онаси ажрашиб кетган. Онаси Патрисия ёшлигида раққоса бўлган, кейинчалик либослар дизайнери сифатида ишлаган. У интервюсида ҳеч қачон ўзини намунали она деб билмаслигини, ўғли ва қизининг улғайишини шунчаки кузатиб бораётганини ҳам яширмаган. Иккинчи турмуш ўртоғи, кинорежиссёр Пол Аарон унинг бутун оиласини ўз ватани — Канадага кўчириб кетган.

Киану улғайиб, мактабга борди ва у ерда кутилмаганда дислексия деб аталадиган муаммога дуч келди. У беш йил ичида тўртта мактабни алмаштирди. Чунки ўқитувчилар унинг ўзига хослигини тан олишни истамас, улардан талаб қилинадиган нарса ҳамма каби бўлиш эди. Шикоятлар ва муваффақияцизликлар ёш Киануни синдира олмади: у хоккейга қизиқа бошлади. Муз устида чаққон, кучли ва тез ҳаракат қиларди. Аммо бир куни жароҳат олиб, клуб билан хайрлашишга мажбур бўлди.

Шу пайтга келиб, Киану бошқа бир севимли машғулот топганди: у ҳаваскорлар театрида ўйнай бошлади. 15 ёшида “Ромео ва Жульетта”да Меркуцио ролини ижро этиб, маҳоратини намойиш қилди. Бу орада мактабдаги ўқиш ҳали ҳам яхши эмасди ва бир куни Киану актёр бўлиш орзусида ўқишни ташлаб кетди. Ва бу мақсад сари шунчаки юриб қўя қолмади: қаерда бўлса ҳам пул топишга уринарди. Дарахт кесди, майсазорларни текислади. Спорт дўконида конкиларни чархлади. Ва, албатта, севиб ҳам қолди.

Тасодифий ва бахтли романтика. Бу пайтга келиб, Киану аллақачон бир нечта муваффақиятли филмларда рол ўйнаган эди: унга ўгай режиссёр отаси илк ролларида ёрдам берган. Дастлабки роллардан сўнг “Ота-оналар”, “Менинг шахсий Айдаҳо штатим”, “Дракула” каби филмларда суратга тушди. Женнифер ҳам кино оламига киришга уриниб кўрди, аммо бу бошқа ҳикоя эди.

Чунки унинг хатти-ҳаракатлари одатий актрисаларникидан фарқ қиларди. У қизга ғамхўрлик қила бошлади, муносабатлари жуда тез ривожланди ва иккаласи ҳам шу қадар бахтли кўринганидан атрофдагилар бунга шубҳа қилмади. Улар Голливуддаги энг чиройли жуфтликлардан бирига айланганди. Жуфтлик бирга яшай бошлади ва тез орада Женнифер фарзанд кутаётгани маълум бўлди. Улар туғилажак қизлари учун ўйингоҳ қурди, исм танлади...

Аммо туғуруққа бир ой қолганда она қорнидаги жажжи юрак уришдан тўхтади. Жуфтлик учун бу мусибатга чидаш жуда оғир бўлди: уларда фақат орзуларининг парчалари қолган эди. Киану ва Женнифер бу фожиадан кейин ўзига кела олмади. Бирга яшаш уларга ҳаммасини қайта-қайта эслатаверди ва шу сабаб ажрашишга қарор қилишди. Орадан бир йил ўтиб Женнифер ҳам ғойиб бўлди. У руҳий тушкунлик билан курашишга уриниб, спиртли ичимликларга ружу қўйди ва маст ҳолатда машина бошқариб, автоҳалокатга учради.

Бу Киануни кутаётган сўнгги синов эмасди. Синглиси Кимнинг лейкемия билан оғриганини билгач, у яна фаол ҳаракатга тушди. Энг яхши шифокорларни топди, керакли дори-дармонларни олди, синглиси билан доим бирга бўлди, филмларда суратга тушишни тўхтатди. Қувноқ мусиқага рақс тушиб, ҳолдан тойган синглисини қучоқлар, ҳеч бўлмаганда унинг юзига табассум олиб келишга уринарди. Шундан сўнг касаллик бироз чекингандек бўлди. Ким соғайиб кетгач, актёр онкологияга қарши жиддий кураш эълон қилди: у дори-дармон ишлаб чиқаришга катта маблағ ажратди ва саратон билан касалланганлар учун фонд ташкил этди.

Бир муддат актриса Клер Форлани Кианунинг ҳамроҳига айланди. У ўша пайтда уй сотиб олишни истамаслиги ва арзон меҳмонхонада ёки ижарада яшаш одати билан барчани ҳайратга солганди. Киану Клер билан учраша бошлагач, барибир уй сотиб олди: миш-мишларга кўра, актёр буни актрисанинг таъсири остида қилган. Атрофдагилар эса тўй ҳақидаги хабарни кутарди. Аммо бу борада ҳеч қандай гап бўлмади. Қолаверса, жуфтлик бирданига ҳеч кимга ҳеч нарсани тушунтирмасдан ажрашди. Киану журналистларнинг барча саволларига хотиржамлик билан “Клер иккимиз шунчаки дўстмиз” деб жавоб берди.

Шундан сўнг актёр яна ёлғиз қолди, кўча ва хиёбонларда сарсон кезди, ўриндиқларда узоқ вақт хаёл сурди, ҳатто кабутарларни овқатлантирганда ёки яқин атрофда ўйнаётган бола билан суҳбатлашганда ҳам юзидан ғам кетмасди. Кийимлари беўхшов, соч-соқолига узоқ вақт қайчи тегмагани сабаб қисқа фурсатда худди уйсиз одамга ўхшаб қолганди. Қариндошлари Кианунинг аҳволидан хавотирда эди: афтидан, у фожиали воқеалардан кейин ўзига кела олмаган, ичида қора тубсизлик пайдо бўлганди. Шунга қарамай, у олдинга интилишни давом эттирди, аммо катта гонорарини уй, машина ва заргарлик буюмларига эмас, балки хайрия ва совғаларга сарфлади. Масалан, афсонавий “Матрица” филмини суратга олиш учун олган барча пулларини актёр визажист, компютер техниклари ва кадр ортидаги бошқа “меҳнаткашлар”га тақсимлаб берди. Шунингдек, ҳар бир каскадёр Кианудан совға сифатида ҳашаматли велосипедлар олди.

Ўша даврда Киану шеър ёзишни бошлади. Шеъриятга бўлган муҳаббат уни 2009-йилда танишган рассом Александра Грант билан яқинлаштирди. Ривзнинг шеърлари Александрани расм ва ҳайкаллар яратишга илҳомлантирди: у актёрни чинакам ноёб совға берган ҳақиқий даҳо деб билди. Актёр ҳам Александранинг ўзини унутиб, ижодга тўлиқ шўнғиш қобилиятидан ҳайратда қолди.

Кўринишидан, Александра Грант Ривзнинг ҳаётга қизиқишини қайта тиклашга муваффақ бўлган. Бироқ айрим мухлислар аёлнинг ташқи кўринишидан ҳайратга тушди: Александра машҳур актёрнинг ёнидаги инсон сифатида одатий тасаввурларга мос келмасди, у оқарган сочларини яширмас ва ёшроқ кўринишга уринмасди. Бундан ташқари, у Кианудан катта кўринса-да, аслида унинг ёши актёрникидан тўққиз ёш кичик.

Бугун Киану Ривзни аввалгидек ёлғиз ва ғамгин ҳолда тасаввур қилиш қийин. Актёр ҳануз шахсий ҳаётини оммадан йироқда сақлайди.

2026-йил май ойида Киану ва Александра Лос-Анжелесдаги МОСА Гала тадбирида бирга қатнашди. Улар қўл ушлашиб, камералар қаршисида бир-бирига бўлган меҳрини яширмади. Грантнинг сўзларига кўра, иккаласи бир-бирининг ижодига ҳурмат билан қарайди ва исталган муаммо ёки ижодий ғоя ҳақида узоқ суҳбатлашиши мумкин.