Кения вазири чет элликларни савдо қилиш учун визалардан «нотўғри фойдаланиш»дан огоҳлантирди
Кения чет эл фуқароларининг кичик бизнес билан шуғулланишини чекловчи чораларни жорий этишни бошлаши кутилмоқда.
Кения вазири чет элликларни савдо қилиш учун визалардан «нотўғри фойдаланиш»дан огоҳлантирди
Савдо вазири Ли Кинянжуи чет эл фуқаролари қонунга риоя қилишлари шартлигини айтмоқда
Кения савдо вазирлиги чет эл фуқароларини мамлакатга визасиз кириш уларга ишлаш ҳуқуқини бермаслиги ҳақида огоҳлантирди, чунки ҳукумат чет элликлар томонидан бошқариладиган лицензиясиз кичик корхоналарни ёпишга киришмоқда.
Президент Уильям Руто бугунги кунни кичик бизнес билан шуғулланувчи чет элликлар учун фаолиятини тўхтатишнинг сўнгги муддати қилиб белгилаган эди.
Ушбу чорадан олдин, Бурундининг Кениядаги элчихонаси бурундиликларга нисбатан ёмон муносабатда бўлинаётгани ҳақидаги хабарлар фонида, уйига қайтишни истовчи ўз фуқароларига фавқулодда бепул саёҳат ҳужжатларини тақдим этишини маълум қилди.
Қанча чет эл фуқароси кичик савдо билан шуғулланаётгани ёки ушбу чоралардан қанча одам жабр кўриши ҳозирча номаълум.
Савдо вазирлиги баёнотида «айрим ташриф буюрувчилар томонидан виза аризаларидан атайлаб нотўғри фойдаланиш» ҳолатлари кузатилаётгани айтилиб, баъзилар Кенияга инвестор ёки сайёҳ сифатида кириб, кейинчалик ўзлари эълон қилган мақомни бузган ҳолда тадбиркорлик фаолияти билан шуғуллангани қўшимча қилинган.
«Чакана ва маҳаллий савдо тармоқларида фаолият юритаётган чет элликлар сони кўплиги сабабли, уларнинг фаолиятини тартибга солиш ва ишга жойлашиш учун рухсатнома қоидаларига риоя қилинишини таъминлаш зарур», деди Савдо вазири Ли Кинянжуи.
Ўтган ҳафта Руто Кения хорижий инвестициялар учун очиқлигини, аммо «Хитойдан ёки бошқа жойдан келган одамнинг кўчада савдогарлик қилиши ёки кичик дўкон очиши» мумкин эмаслигини айтган эди.
Унинг сўзларига кўра, инвесторлар кичик бизнесда кенияликлар билан рақобатлашиш ўрнига, иш ўринлари яратиши ва ишлаб чиқаришни кўпатириши керак.
Рутонинг баёнотлари турлича муносабатларга сабаб бўлди, айрим танқидчилар буни ксенофобияни кучайтириш хавфини туғдирадиган популистик қадам деб аташди. Ҳукумат расмийлари бу даъвони рад этмоқда.
Бурунди Ташқи ишлар вазири Эдуард Бизимана X ижтимоий тармоғидаги постида «Бурундидаги кенияликлар тинч-тотув яшаётгани, аммо Бурундига қарши нафрат нутқи давом этса, вазият албатта ўзгаришини» айтди.
«Кения ҳукумати Кенияда яшовчи бурундиликлар ҳаёти учун жавобгардир», дея қўшимча қилди у.
Бизимананинг пости минтақадаги иқтисодий интеграцияни тарғиб қилувчи саккиз аъзодан иборат Шарқий Африка ҳамжамияти (EAC) вакиллари билан ўтказган шошилинч учрашувидан сўнг эълон қилинди.
Кения ҳам, Бурунди ҳам ушбу гуруҳга аъзодир. Бизимана томонидан Бурундида чақирилган учрашувда Кения вакиллари ҳам иштирок этди.
Бизимана Кения элчисидан Бурундининг хавотирларини ўз ҳукуматига етказишни ва ҳеч бир бурундилик зўравонликка дучор бўлмаслигини таъминлашни сўраганини айтди.
Якшанба куни Кения Ташқи ишлар вазирлигининг юқори лавозимли мулозими зарур ҳужжатларга, жумладан «ишлаш учун рухсатнома ва лицензияларга» эга бўлган чет элликлар ўз фаолиятини давом эттиришлари мумкинлигини айтди.
«Бурунди фуқаролари ва барча шарқий африкаликлар — ва умуман африкаликлар — агар улар ўз бизнесларини ёки ишларини қонунларимиз талабларига мувофиқ олиб борсалар, Кенияда эркин яшашлари мумкин», деди доимий котиб Корир Синг'оеи.
Бироқ, ҳукуматнинг бу тушунтириши айрим хорижлик тадбиркорларнинг хавотирларини у қадар юмшата олмади.
Кенияда яшовчи бурундиликлар уюшмаси раҳбари Алексис Нтинанирва BBC Great Lakes хизматига Рутонинг қароридан норози эканлигини, бироқ бурундиликларни сабр-тоқатли бўлишга чақираётганини айтди.
У бу масала кенгроқ минтақавий оқибатларга олиб келиши мумкинлигидан огоҳлантирди, чунки кенияликлар ҳам Шарқий Африканинг бошқа мамлакатларида кичик бизнес билан шуғулланади.
«Бу муаммо нафақат Кенияда ишлаётган бурундиликлар учун, балки минтақада ҳам муаммолар туғдиради, чунки бизнинг мамлакатларимизда — Бурунди, Танзания ва Угандада ҳам бундай кичик ишларни қилаётган кенияликлар бор».
Нтинанирва кўча савдоси ва бошқа кичик бизнес билан шуғулланувчи бурундиликларга полиция билан тўқнашувлардан қочишни маслаҳат берди.