«Кечирасиз, сиз ўлгансиз»: булунғурлик аёл тириклигини исботлай олмаётганини айтмоқда
Булунғур туманида яшовчи 25 ёшли аёл давлат электрон базаларида вафот этган шахс сифатида қайд этилганини айтмоқда. Унинг сўзларига кўра, туғуруқхонадаги хатолик сабаб 2022-йилда у ва чақалоғи «она ва бола ўлими» сифатида базага киритилган, 4 йил ўтган бўлса-да, Фасе ИД тизими ва МйГов иловасида «фуқаро тирик эмас» деган маълумот чиқмоқда. Вилоят ССБ муаммо бартараф этилганини баён қилди.
«Кечирасиз, сиз ўлгансиз»: булунғурлик аёл тириклигини исботлай олмаётганини айтмоқда
Унинг айтишича, бу ҳолат 2022-йил 14-август куни биринчи фарзандини дунёга келтириш учун туғуруқхонага мурожаат қилганидан сўнг юзага келган.
- Биринчи туғруғимда туғуруқхонага борганман. Болам сунъий туғуруқ орқали туғилган. Орадан уч кун ўтиб, мен туғуруқхонадан чиққанимдан кейин қандайдир хатолик билан бола ўлимига она ўлими ҳам қўшиб киритилган экан. Шундан кейин мени давлат базасида вафот этган деб чиқариб юборишган, - дейди Бибимарям Холбўтаева.
Аёл бу ҳақда кейинги йили иккинчи бор туғуруқхонага борганда билиб қолган.
- Тизимдан мени топа олишмаган. «Фуқаро, сиз база бўйича ўлик деб чиқяпсиз», дейишди. Бу қандай бўлиши мумкинлигини сўраганимизда, туғуруқхона ходимлари хатолик ўзларидан ўтганини тан олишди. Ҳатто кичик қоғозга хатолик бўйича тилхат ҳам ёзиб беришди, - дейди у.
Шундан кейин унинг яқинлари турли идораларга мурожаат қилиб, маълумотларни тўғрилашга уринган. Натижада аёлнинг айрим ҳужжатларидаги муаммо бартараф этилган, иккинчи фарзанди учун туғилганлик ҳақидаги гувоҳнома ҳам олинган.
Бироқ муаммо электрон биометрик тизимларда сақланиб қолган.
- Менга ҳужжатларингиз ҳал бўлди, деб айтишди. Лекин Фасе ИД орқали текширилганда ҳамон «фуқаро тирик эмас» деган жавоб чиқяпти. Бу ҳолатни кредит олиш учун марказга борганимда яна кўрдим. Паспортимни бердим, Фасе ИД орқали текширишганда «фуқаро тирик эмас» деб чиқди, - дейди Холбўтаева.
Унинг сўзларига кўра, МйГов иловасида ҳам худди шундай маълумот акс этган.
- Исбот учун МйГов иловасини ҳам юклаб кўрдим. У ерда ҳам фуқаро вафот этган деб кўрсатилган. Паспорт столига борсам, улар «муаммо бизда эмас, база ишламайди», дейишди. Туғуруқхонага борсам, бош шифокор ҳам ҳайрон бўлди. «Сизни тирик деб киритиб берганмиз, бундай ҳолат биринчи марта бўляпти», дейишди, - дейди аёл.
Бибимарям Холбўтаева муаммони ҳал қилиш учун бир қатор давлат идораларининг ишонч телефонларига қўнғироқ қилганини айтмоқда.
- Менга уч кун ичида жавоб беришларини айтишди, аммо жавоб бўлмади. Кейин 1000 рақамига қўнғироқ қилдим. Вазиятни тушунтирсам, «фуқаро, кечирасиз, агар сиз тизимда ўлган деб топилган бўлсангиз, аризангизни қабул қила олмайман», деган жавобни олдим, - дейди у.