Касбий таълим ташкилотлари директорларига менежерлик сертификати талаби жорий этилади
**Касбий таълим ташкилотлари директорлари учун менежерлик сертификати мажбурий бўлади**
Вазирлар Маҳкамасининг 20-августдаги қарорига мувофиқ, касбий таълим муассасалари директорлари ва уларнинг ўринбосарларини менежерлик ўқув курсларида ўқитиш ҳамда уларга менежерлик сертификатини бериш тартиби тасдиқланди.
Ушбу ҳужжатга кўра, 2026/2027-ўқув йилидан бошлаб касбий таълим ташкилотлари директорлигига номзодларни тайинлашда менежерлик сертификатининг мавжудлиги шарт қилиб қўйилади. Шунингдек, амалдаги директорлар ва уларнинг ўринбосарлари ҳам менежерлик ўқув курсларида таълим оладилар.
**Курслар қандай ташкил этилади?**
Менежерлик ўқув курсларига директорлар ва директор ўринбосарлари махсус портал орқали рўйхатдан ўтадилар. Аризалар календар йил давомида электрон шаклда қабул қилинади. Курсга қабул қилинган тингловчиларга курс бошланишидан аввал унинг давомийлиги ва ўтказилиш тартиби ҳақида батафсил маълумот берилади.
Ўқув курси 144 соатлик бўлиб, бир ҳафталик аудитория машғулотлари ва мустақил таълимни ўз ичига олади. Машғулотлар анъанавий, масофавий, мустақил ёки аралаш шаклларда ташкил этилиши мумкин.
Курс якунида тингловчилар якуний синов топширадилар. Синов тест ва амалий топшириқлардан иборат бўлиб, тест қисмида 50 та савол берилади. Тестдан камида 70 балл тўплаш талаб этилади. Амалий топшириқларни бажариш учун эса 30 дақиқа вақт ажратилади.
Якуний синов натижасида 70 ва ундан юқори балл тўплаган тингловчилар синовдан муваффақиятли ўтган ҳисобланади ва уларга менежерлик сертификати берилади. Синовдан ўта олмаган тингловчилар қайта топшириш имкониятига эга бўладилар.
**Сертификатнинг амал қилиш муддати ва янгилаш тартиби**
Менежерлик сертификати унинг эгасига махсус портал орқали электрон шаклда тақдим этилади. Сертификатнинг амал қилиш муддати 5 йил этиб белгиланган. Сертификатлар реестри ҳам махсус портал орқали юритилади.
Сертификат муддати тугагач, директорлар ва директор ўринбосарлари уни қайта олиш учун ўқув курсида қайта ўқиши ҳамда якуний синовдан ўтиши шарт.
**Кимлар курсга қатнашмасдан синов топшириши мумкин?**
Қарорда айрим директор ва директор ўринбосарлари учун алоҳида тартиб ҳам белгиланган. Жумладан, сўнгги уч йил давомида касбий фаолиятида юқори натижаларга эришган ҳамда тегишли мезонларга жавоб берадиган шахслар ўқув курсида қатнашмасдан якуний синовда иштирок этиши мумкин.
Шунингдек, айрим ҳолларда тингловчилар якуний синовдан озод этилиши мумкин. Бундай ҳолатлар низомда белгиланган талаблар асосида кўриб чиқилади.
**Сертификатни бериш тартиби**
Якуний синовдан муваффақиятли ўтган тингловчиларга сертификат агентлик томонидан тасдиқланган якуний синов натижаларига асосан берилади. Сертификат махсус портал орқали электрон шаклда расмийлаштирилади. Унда сертификат рақами, берилган сана ва тартиб рақами, амал қилиш муддати ҳамда бошқа тегишли маълумотлар кўрсатилади.
Қарорда, шунингдек, директор ва директор ўринбосарларининг менежерлик ўқув курслари учун 2026-йилда харажатлар республика бюджетидан қопланиши, 2027-йилдан эса ўқиш харажатлари тегишли шартнома асосида амалга оширилиши белгиланган.
Ушбу янги тартиб касбий таълим ташкилотлари раҳбарларининг бошқарув ва педагогик кўникмаларини ривожлантириш, уларнинг малакасини мунтазам ошириб бориш ҳамда директорлик лавозимига тайинлашда менежерлик компетенсияларини ҳисобга олишни назарда тутади.