Канадалик депутат парламентда адашиб СИ жавобини ўқиб берди (видео)

Канадалик депутат Билл Оливер парламентдаги нутқи чоғида беихтиёр ЧатГПТ томонидан фақат унинг ўзи учун тайёрланган жавоб қисмини ўқиб берди. Ушбу ҳолат акс этган видео ижтимоий тармоқларда кенг тарқалиб кетди. Бу ҳақда Тҳе Индепендент нашри хабар берди.

Ню Брансуик провинсиясидан сайланган депутат сунъий интеллект жавобини асосий матндан ажрата олмай, уни нутқига қўшиб ўқиб юборган. У шундай деган: “Мана ушбу бўлимнинг қисқа пунктлар эмас, балки қонунчилик нутқига ўхшаб ўқиладиган янада табиий ва равонроқ варианти”.

Бу жумла чатботнинг матн бўйича таклиф этган варианти ва унга берган изоҳи эди. Оливер нутққа шу қадар берилиб кетганидан, тайёр матн ўрнига сунъий интеллект берган жавобни ўқиганини сезмаган. Ноқулай вазиятга қарамай, у ҳеч нарса бўлмагандек нутқини давом эттирган.

Депутат нутқни тайёрлашда айнан қайси сунъий интеллект хизматидан фойдалангани номаълум. Шунингдек, матн устида Оливернинг ўзи ишлаганми ёки унинг ходимларидан бири шундай қилганми – бу ҳам аниқ эмас.

Аввалроқ АҚШ Киберхавфсизлик агентлигининг вақтинчалик раҳбари ЧатГПТъга хизмат файлларини сиздиргани аниқланганди. Бу файллар “фақат хизмат доирасида фойдаланиш учун” белгиси қўйилган ва оммавий тарқатишга мўлжалланмаган СИСА шартнома ҳужжатларидан иборат бўлган.